06.10.2026 | 23:14
Դեսպան Մկրտչյանը Վաշինգտոնում հյուրընկալել է Նոբելյան մրցանակի դափնեկիր Քայլաշ Սաթյարթիին
Զախարովան, արձագանքելով Բաքվին, հայտարարել է, որ ՌԴ-ն «պաշտոնապես Ղարաբաղը ճանաչում է Ադրբեջանի տարածք»
Քաղաքականություն
10.06.2025 | 12:53
Մոսկվան կոչ է անում համատեքստից չկտրել ՌԴ նախագահի խորհրդական Վլադիմիր Մեդինսկիի խոսքերը Ղարաբաղի վերաբերյալ։ Այս մասին ՏԱՍՍ-ին ասել է ՌԴ ԱԳՆ պաշտոնական ներկայացուցիչ Մարիա Զախարովան։
«Պետք չէ գոյություն չունեցող թեզերը հանել համատեքստից և փոխել բառերը՝ դրանց տալով բոլորովին այլ իմաստ»,- նշել է նա։
Զախարովան ընդգծել է՝ «Ռուսաստանը պաշտոնապես այդ տարածաշրջանը ճանաչում է Ադրբեջանի տարածք»։ Նա հավելել է, որ Մեդինսկին խոսել է «պատմական ասպեկտի, սոցիալ-մշակութային առանձնահատկությունների և մարդկանց ցավի» մասին։
Հիշեցնենք՝ Վլադիմիր Մեդինսկին հայտարարել էր, որ «եթե Ուկրաինայում հակամարտությունը դադարեցվի առաջնագծում՝ առանց իրական խաղաղության շուրջ համաձայնության գալու, այդ տարածաշրջանը կվերածվի հսկայական Ղարաբաղի, որը Ուկրաինան, ՆԱՏՕ-ի իր դաշնակիցների հետ որոշ ժամանակ անց կփորձի վերադարձնել»։
«Եթե դադարեցնենք հակամարտությունը ռազմաճակատի երկայնքով և չպայմանավորվենք իրական խաղաղության հարցում, պարզապես կնքենք ինչ-որ հրադադար, ապա, գիտեք, Հայաստանի և Ադրբեջանի միջև կար վիճելի տարածաշրջան՝ Ղարաբաղը, և այդ տարածաշրջանը կվերածվի հսկայական Ղարաբաղի։ Որոշ ժամանակ անց Ուկրաինան, ՆԱՏՕ-ի իր դաշնակիցների հետ միասին, կփորձի այն հետ նվաճել, և դա կլինի մոլորակի վերջը, դա կլինի միջուկային պատերազմ»,- ասել էր Մեդինսկին։
Ի պատասխան ՝ Ադրբեջանի ԱԳՆ-ն կոշտ հայտարարությամբ էր հանդես եկել։
«Ռուսաստանի նախագահի օգնական Վլադիմիր Մեդինսկիի՝ Russia Today-ին տված հարցազրույցում արված հայտարարությունը, որում աղավաղվել են նախկին հայ-ադրբեջանական հակամարտության վերաբերյալ փաստերը, իսկ Ղարաբաղը ներկայացվել է որպես վիճելի տարածք, ափսոսանք ու զարմանք է առաջացնում։ Զարմանալի է, որ ՌԴ նախագահի օգնականն ու Ռուսաստանում պատմական կրթության միջգերատեսչական հանձնաժողովի նախագահ Մեդինսկին չգիտի, որ Ղարաբաղը երբեք վիճելի տարածք չի եղել։ Կցանկանայինք հիշեցնել, որ Ղարաբաղն Ադրբեջանի հնամենի հողն է։ Ռուսաստանն ինքն է ճանաչել և ճանաչում Ղարաբաղը որպես Ադրբեջանի տարածք։ Միևնույն ժամանակ, վիճելի կետն այն է, որ երկրի նախագահի օգնականը կա՛մ չի հասկանում, կա՛մ չի ուզում հասկանալ իր պետության դիրքորոշումն այս հարցում»,- ասել էր Ադրբեջանի ԱԳՆ մամուլի խոսնակ Այխան Հաջիզադեն։
Թարգմանությունը՝ Էմմա Չոբանյանի
