Քաղաքականություն
10.06.2025 | 11:48
ՌԴ Պաշտպանության նախարարությունը հայտնել է հունիսի լույս 10-ի գիշերը հարյուրից ավելի ԱԹՍ խոցելու մասին։ Տելեգրամ ալիքները գրում են Թաթարստանում և Մոսկվայի մարզում անօդաչու թռչող սարքերի հարվածների մասին։ Լենինգրադի մարզում ժամանակավորապես անջատվել են բջջային կապն ու ինտերնետը, իսկ Ռոսավիացիան սահմանափակել է թռիչքները Մոսկվայի օդանավակայաններում, փոխանցում է Current time-ը։
ՌԴ ՊՆ-ն հայտնել է, որ գիշերվա ընթացքում ՀՕՊ ուժերը որսացել և ոչնչացրել են ուկրաինական 102 անօդաչու թռչող սարք․ 46-ը՝ Բրյանսկի մարզում, 20-ը՝ Բելգորոդի մարզում, 9-ը՝ Վորոնեժի մարզում և բռնակցված Ղրիմում, 4-ական՝ Կալուգայի մարզում և Թաթարստանում, 3-ը՝ Մոսկվայի մարզում, 2-ական՝ Լենինգրադի, Օրյոլի և Կուրսկի մարզերում և 1-ը՝ Սմոլենսկի մարզում։
Լենինգրադի մարզի նահանգապետ Ալեքսանդր Դրոզդենկոն հայտնել է, որ մի շարք շրջաններում բջջային կապի և ինտերնետի սահմանափակումներ են մտցվել: Նրա փոխանցմամբ՝ տուժածներ և ավերածություններ չկան։
Ռոսավիացիան գիշերը ժամանակավոր սահմանափակումներ է մտցրել Մոսկվայի ավիահանգույցի բոլոր օդանավակայաններում («Շերեմետևո», «Դոմոդեդովո», «Վնուկովո», «Ժուկովսկի»), ինչպես նաև Սարատովում, Սամարայում, Կազանում, Կալուգայում, Նիժնեկամսկում, Իժևսկում, Կիրովում և Սանկտ Պետերբուրգի «Պուլկովո»-ում: Սահմանափակումները վերացվել են միայն առավոտյան:
Թաթարստանում ԱԹՍ-ները գրոհել են Նիժնեկամսկը։ Ելաբուգայի բնակիչները նույնպես հայտնել են պայթյունների մասին: Նիժնեկամսկի շրջանի ղեկավար Ռադմիր Բելյաևը հայտնել է, որ քաղաքի վրա անօդաչու թռչող սարք է ոչնչացվել, տուժածներ չկան։
Կալուգայի նահանգապետ Վլադիսլավ Շապշան հայտարարել է, որ անօդաչու թռչող սարքեր են ոչնչացվել Կիրովսկի, Սուխինիչսկի, Բարիատինսկի և Բորովսկի շրջաններում, տուժածներ և վնասներ չկան։
Վորոնեժի և Օրյոլի նահանգապետեր Ալեքսանդր Գուսևը և Անդրեյ Կլիչկովը նույնպես հայտարարել են, որ տուժածներ և ավերվածություններ չկան։
Թարգմանությունը՝ Էմմա Չոբանյանի
