Քաղաքականություն
10.06.2025 | 11:17
Ռուսական զորքերը հունիսի լույս 10-ի գիշերը հերթական զանգվածային հարձակումն են իրականացրել ուկրաինական քաղաքների վրա՝ օգտագործելով հարվածային ԱԹՍ-ներ։ Մասնավորապես, ԱԹՍ-ներով հարձակում է իրականացվել Կիևի վրա, հայտնել է Կիևի քաղաքային ռազմական վարչակազմի ղեկավար Տիմուր Տկաչենկոն։
Նրա խոսքով՝ ՀՕՊ ուժերի աշխատանքի շնորհիվ «հնարավոր է եղել կորուստները նվազագույնի հասցնել»։
Ուկրաինայի ռազմաօդային ուժերը նաև հայտնել են, որ Կիևի վրա բալիստիկ հրթիռներ են արձակվել։ Կիևի քաղաքապետ Վիտալի Կլիչկոն էլ հայտարարել է, որ գիշերային հարձակման հետևանքով չորս մարդ է վիրավորվել, բոլորը հոսպիտալացվել են։
Կիևի յոթ շրջանում գրանցվել են տարբեր վնասներ։ Կիևի մարզային վարչակազմը հայտնել է, որ քաղաքի Դարնիցկի, Օբոլոնսկի և Շևչենկովսկի շրջաններում վնասվել են բնակելի շենքեր։ Դարնիցկիում անօդաչուի բեկորների ընկնելու հետևանքով ավերվել է բնակելի շենք, հրդեհներ են գրանցվել ոչ բնակելի և բնակելի շենքերում, ինչպես նաև պահեստներում։
Ռուսական անօդաչու թռչող սարքերը գիշերը հարձակվել են նաև Օդեսայի վրա։ Մարզային վարչակազմի ղեկավար Օլեգ Կիպերի խոսքով՝ քաղաքի կենտրոնում բնակելի շենքերն ավերվել և վնասվել են, իսկ շտապօգնության կայանի վարչական շենքը՝ ամբողջությամբ ավերվել։ Գիշերային հարձակման արդյունքում վնասվել է ծննդատան վարչական մասը։
«Բարեբախտաբար, զոհեր կամ տուժածներ չկան։ Սակայն փաստը, որ հարձակման տակ է հայտնվել այն հաստատությունը, որտեղ կյանք է ծնվում, աչքի է ընկնում իր դաժանությամբ»,- հայտարարել է Օդեսայի քաղաքապետ Գենադի Տրուխանովը։
Օդեսայի մարզային դատախազությունը հայտնել է, որ քաղաքը հարձակման է ենթարկվել ավելի քան 10 ԱԹՍ-ի կողմից։ Արդյունքում 2 զոհ և 9 վիրավոր կա։
«Վնասվել են բնակելի շենքեր, ծննդատան շենքը, շտապօգնության կայան, մասնավոր բժշկական կլինիկա, մարզական համալիր, կենդանաբանական այգի, երկաթուղային կայարանի շենք և ավտոմեքենաներ»,- ասվում է հաղորդագրության մեջ։
Ռուսական կողմը դեռևս չի մեկնաբանել հարձակումները։
Թարգմանությունը՝ Էմմա Չոբանյանի
