Անկարան հետևում է Իսրայելի կողմից կալանված Գազա օգնություն տեղափոխող նավի անձնակազմի՝ Թուրքիայի քաղաքացիների իրավիճակին

Թուրքիան «ուշադիր հետևում է» Իսրայելի կողմից հարձակման ենթարկված Madleen նավում գտնվող իր քաղաքացիների իրավիճակին։ Այս մասին հայտնել են դիվանագիտական ​​աղբյուրները, գրում է Turkiye today-ը։

Աղբյուրները նշել են, որ Թել Ավիվում Թուրքիայի դեսպանատունը ձեռնարկել է անհրաժեշտ քայլերը՝ նավի ափ հասնելուց հետո քաղաքացիների՝ հնարավորինս շուտ ազատ արձակումն ապահովելու համար։ Նրանք հավելել են, որ թուրք քաղաքացիների հարազատները պարբերաբար տեղեկացվում են ընթացիկ իրավիճակի մասին։

Հիշեցնենք, որ Իսրայելի զինվորականները կալանել են Madleen նավը, որով շվեդ հայտնի ակտիվիստ Գրետա Թունբերգը և այլ ակտիվիստներ մարդասիրական օգնություն էին փոխադրում Գազա։ Նավը զինվորական հսկողության ներքո ուղարկվել է Իսրայելի ափեր։

Նավում են եղել Եվրախորհրդարանի ֆրանսիացի անդամ Ռիմա Հասանը, Գերմանիայի քաղաքացի Յասեմին Աջարը, Թուրքիայից Հուսեյն Սուայբ Օրդուն, Բրազիլիայից Տիագո Ավիլան, Իսպանիայից Սերխիո Տորիբիոն, Նիդերլանդներից Մարկո վան Ռենը, Ֆրանսիայից Բապտիստ Անդրեն, Ռևա Վիարդը, Պասկալ Մորիերասը, Օմար Ֆայադը և Յանիս Մհամդին, Շվեդիայից Գրետա Թունբերգը։

Թուրքիայի արտաքին գործերի նախարարությունն էլ հայտարարել է՝ սպասվում է, որ նավը ափ կհասնի երեկոյան։ Նշվում է, որ իշխանության ներկայացուցիչները ջանքեր են գործադրում ուղևորների հետ հանդիպելու համար՝ ափ իջնելուց անմիջապես հետո՝ նրանց ազատ արձակումն ապահովելու նպատակով։ Նախարարությունը հավելել է, որ կապի մեջ է այլ երկրների հետ, որոնց քաղաքացիները նույնպես նավի վրա են։

Այսօր ավելի վաղ էլ Թուրքիայի ԱԳՆ-ն խստորեն դատապարտել էր Իսրայելի զինված ուժերի կողմից Գազա ուղևորվող Madleen մարդասիրական օգնության նավի կալանավորումը՝ այն անվանելով «միջազգային իրավունքի ակնհայտ խախտում»:

Թարգմանությունը՝ Էմմա Չոբանյանի