Իսրայելը գործում է որպես «ահաբեկչական պետություն»․ Անկարան դատապարտել է Գազա օգնություն փոխադրող նավի կալանավորումը

Թուրքիայի ԱԳ նախարարությունը խստորեն դատապարտել է Իսրայելի զինված ուժերի կողմից Գազա ուղևորվող  Madleen մարդասիրական օգնության նավի կալանավորումը՝ այն անվանելով «միջազգային իրավունքի ակնհայտ խախտում»:

«Իսրայելական ուժերի միջամտությունը Madleen նավի հետ կապված իրավիճակին, որը մեկնել էր մարդասիրական օգնություն հասցնելու Գազա, մինչ այն գտնվում էր միջազգային ջրերում, միջազգային իրավունքի ակնհայտ խախտում է»,-ասվում է Թուրքիայի ԱԳՆ հայտարարության մեջ։

Անկարայի գնահատմամբ՝ «Նեթանյահուի կառավարության այս նողկալի արարքը, որը սպառնում է նավարկության ազատությանը և ծովային անվտանգությանը, կրկին ցույց է տալիս, որ Իսրայելը գործում է որպես ահաբեկչական պետություն»։

«Միջազգային հանրության արդարացի արձագանքը Իսրայելի ցեղասպան քաղաքականության դեմ, որը Գազայում սովը որպես զենք է օգտագործում և խոչընդոտում է մարդասիրական օգնության մատակարարմանը, կշարունակվի։ Իսրայելի ագրեսիվ և անօրինական գործողությունները չեն լռեցնի մարդկային արժանապատվության և համընդհանուր արժեքների համար պայքարող ձայները»,- հայտարարում է Թուրքիայի ԱԳՆ-ն։

Հիշեցնենք, որ Իսրայելի զինվորականները կալանել են Madleen նավը, որով շվեդ հայտնի ակտիվիստ Գրետա Թունբերգը և այլ ակտիվիստներ մարդասիրական օգնություն էին փոխադրում Գազա։ Նավը զինվորական հսկողության ներքո ուղարկվել է Իսրայելի ափեր։

Գազայում պատերազմը հանգեցրել է Թուրքիայի և Իսրայելի միջև հարաբերությունների վատթարացմանը։ Թուրքիան  միջազգային ասպարեզում պաշտպանում է Իսրայելի կողմից Գազայի հատվածում թիրախավորված պաղեստինցիների իրավունքները և հաճախ հյուրընկալում ՀԱՄԱՍ-ի հայտնի գործիչներին։

Թարգմանությունը՝ Էմմա Չոբանյանի