Քաղաքականություն
09.06.2025 | 20:59
Միավորված Ազգերի Կազմակերպությունը (ՄԱԿ) պետք է տեղափոխվեր Սոչի, ինչպես առաջարկել էր ԽՍՀՄ առաջնորդ Իոսիֆ Ստալինը, երբ քննարկվում էր ՄԱԿ-ի ստեղծման հարցը։ Այս մասին հայտարարել է Ռուսաստանի արտաքին գործերի նախարար Սերգեյ Լավրովը՝ ելույթ ունենալով «Ապագա ֆորում 2050»-ին, գրում է ՌԲԿ-ն։
«Ամենալավը կլիներ ՄԱԿ-ը տեղափոխել Սոչի։ Ի դեպ, Ստալինն է սա առաջարկել, և նա լրջորեն էր առաջարկել։ Բայց հետո նա ընդառաջ գնաց ԱՄՆ նախագահ Ֆրանկլին Ռուզվելտին՝ այն տեղակայելու սկզբում՝ Լոնգ Այլենդում, ապա Նյու Յորքում՝ Մանհեթենում»,- ասել է Լավրովը։
Նրա կարծիքով՝ հիմա դա անելն անիրատեսական է, քանի որ «այս բոլոր կառույցները խորը արմատներ են գցել»։ Դա վերաբերում է ոչ միայն գույքին, այլև անձնակազմին. մշտական պայմանագրերի ներդրումից հետո աշխատակիցները նաև անշարժ գույք են ձեռք բերել ԱՄՆ-ում։
«Եթե մենք հանկարծ [ՄԱԿ-ը] տեղափոխենք մեկ այլ վայր, դա կլինի ժողովուրդների այնպիսի տեղահանություն, որ նույնիսկ պատկերացնելը սարսափելի է»,- նշել է ՌԴ ԱԳ նախարարը։
Այն մասին, թե Ստալինն առաջարկել է ՄԱԿ-ի կենտրոնակայանը Սոչի տեղափոխել, Լավրովը խոսել էր 2019 թվականին՝ մեկնաբանելով ՄԱԿ-ի Գլխավոր վեհաժողովին մասնակցելու համար ռուսական պատվիրակության մի մասին ամերիկյան վիզաներ տրամադրելու հետ կապված խնդիրները։ ՄԱԿ-ում Ռուսաստանի մշտական ներկայացուցչությունն այն ժամանակ հայտարարել էր, որ Միացյալ Նահանգներն անտեսում է իր պարտավորությունները որպես կազմակերպության կենտրոնակայանը հյուրընկալող երկիր։
Թարգմանությունը՝ Էմմա Չոբանյանի
