Քաղաքականություն
09.06.2025 | 17:09
Դնեպրոպետրովսկի մարզում ռուսական հարձակումն իրականացվում է, այդ թվում, Ուկրաինայում «անվտանգության գոտի» ստեղծելու համար, ինչպես խոստացել էր Ռուսաստանի նախագահ Վլադիմիր Պուտինը, որն անհրաժեշտ է ՌԴ սահմանները պաշտպանելու համար։ Այս մասին ճեպազրույցի ժամանակ հայտարարել է Կրեմլի խոսնակ Դմիտրի Պեսկովը, գրում է ՏԱՍՍ-ը։
Նա հավելել է՝ ռազմական գործողությունների նրբությունների մասին պետք է հարցնել ՊՆ-ին։
Նախօրեին ՌԴ ՊՆ-ն հայտարարել էր, թե «Կենտրոն» զորախմբի 90-րդ տանկային դիվիզիայի ստորաբաժանումները հասել են Դոնեցկի ինքնահռչակ հանրապետության արևմտյան սահման և շարունակում են հարձակողական գործողությունները Դնեպրոպետրովսկի մարզի տարածքում։
Ուկրաինական զինված ուժերի հրամանատարությունը հերքել էր Ռուսաստանի ՊՆ-ի հայտարարությունը, որ ռուսական բանակը հարձակում է իրականացնում Ուկրաինայի Դնեպրոպետրովսկի մարզում։
«Տեղեկատվությունը չի համապատասխանում իրականությանը։ Դոնեցկի մարզում մարտական գործողությունները շարունակվում են։ Թշնամին չի մտել Դնեպրոպետրովսկի մարզ»,- ասել էր Ուկրաինայի ԶՈՒ գլխավոր շտաբի ներկայացուցիչ Անդրեյ Կովալյովը։
Միևնույն ժամանակ, Հարավային պաշտպանության ուժերը հայտարարություն էին տարածել, որ Ռուսաստանը չի հրաժարվել Դնեպրոպետրովսկի մարզ մտնելու մտադրություններից, սակայն ուկրաինական բանակը «քաջաբար և պրոֆեսիոնալ կերպով պահպանում է ռազմաճակատի իր հատվածը՝ խափանելով օկուպանտի ծրագրերը»։
Թարգմանությունը՝ Էմմա Չոբանյանի
