10.12.2025 | 20:39
Հայաստան–Հունաստան հարաբերությունների խորացման նոր հնարավորություններ. Դավիթ Կարապետյանի հանդիպումը Լուկաս Ցուկալիսի հետ
Ուկրաինական կողմը Չուվաշիայում գրոհել է ՌԴ բանակի համար ԱԹՍ-ի բաղադրիչներ արտադրող ձեռնարկությունը․ ՏԵՍԱՆՅՈՒԹ
Քաղաքականություն
09.06.2025 | 14:33
ՌԴ Չուվաշիայի Հանրապետության ղեկավար Օլեգ Նիկոլաևը հայտարարել է «ВНИИР» ձեռնարկության վրա անօդաչու թռչող սարքերի հարվածի մասին։ Նշվում է, որ ձեռնարկությունը դադարեցրել է գործունեությունը: Ենթադրաբար, այն ռուսական բանակի համար արտադրում է «Կոմետա» ընդունիչներ, գրում է Current time-ը։
«Երկու անօդաչու թռչող սարք է ընկել «ВНИИР»-ի տարածքում, այդ պատճառով որոշում է կայացվել ժամանակավորապես դադարեցնել արտադրությունը՝ աշխատակիցների անվտանգությունն ապահովելու համար: Եվս մեկ անօդաչու թռչող սարք է ընկել Չեբոկսարի և Կրասնոարմեյսկի քաղաքային շրջանների դաշտերում, մարդկանց համար սպառնալիք չկա»,- նշել Նիկոլաևը։
Նրա տվյալներով՝ տուժածներ չկան։
«ВНИИР» ԲԲԸ-ն գտնվում է Չավուշիայի մայրաքաղաք Չեբոկսարում։ Այն արտադրում է պաշտպանության համակարգեր և ավտոմատ կառավարման համակարգեր ենթակայանների, ցածր, միջին և բարձր լարման էլեկտրական սարքավորումների համար: Astra տելեգրամ ալիքի տվյալներով՝ ձեռնարկությունը ռուսական բանակի համար արտադրում է «Կոմետա» ընդունիչներ, որոնք պաշտպանում են ռուսական անօդաչու թռչող սարքերն ուկրաինական ռադիոէլեկտրոնային պայքարի համակարգերից։
Ռուսաստանի ՊՆ-ն հայտնել է, որ հակաօդային պաշտպանության համակարգերը գիշերը Ռուսաստանի մարզերում խոցել են 49 անօդաչու թռչող սարք։ Ամենաշատ անօդաչու թռչող սարքերը որսացել են Կուրսկի և Նիժնի Նովգորոդի մարզերում՝ 13-ական։ Վորոնեժի և Օրյոլի մարզերում ոչնչացվել է 9 անօդաչու թռչող սարք, Բրյանսկի և Չուվաշիայի մարզերում՝ 2-ական։ Եվս մեկը խփվել է Բելգորոդի մարզում։ Անօդաչու թռչող սարքերի հարվածների պատճառով Ռուսաստանի չորս քաղաքների օդանավակայանները մի քանի ժամով սահմանափակել են աշխատանքը։
Ուկրաինայի Զինված ուժերի Գլխավոր շտաբը հաստատել է Չեբոկսարում ձեռնարկությանը հասցված հարվածը։
«Սա ՌԴ ռազմարդյունաբերական համալիրի օբյեկտ է, նավիգացիոն սարքավորումներ արտադրող։ Ռազմարդյունաբերական համալիրի ձեռնարկություն, որն ապահովում է «Կոմետա» ընդունիչների արտադրությունը, որոնք օգտագործվում են, մասնավորապես, «Շահեդ» տիպի հարվածային անօդաչու թռչող սարքերում, կառավարվող ավիառումբերի միասնական պլանավորման և ուղղման մոդուլներում»,- ասվում է ուկրաինական զինվորականների հայտարարության մեջ։
Գլխավոր շտաբի տվյալներով՝ հարվածը հանգեցրել է լայնածավալ հրդեհի։
Թարգմանությունը՝ Էմմա Չոբանյանի
