Լոս Անջելեսում Ազգային գվարդիայի տեղակայումից հետո բողոքի ցույցերը սրվել են․ ցուցարարների և անվտանգության ուժերի միջև բախումներ են գրանցվել

Լոս Անջելեսում կիրակի լարվածությունը սրվել է, երբ հազարավոր ցուցարարներ դուրս  են եկել  փողոցներ՝ ի պատասխան ԱՄՆ նախագահ Դոնալդ Թրամփի կողմից Ազգային գվարդիայի արտակարգ տեղակայման որոշման։ Նրանք փակել են գլխավոր մայրուղին, մեքենաներ հրկիզել, իրավապահներն իրենց հերթին ամբոխին զսպելու համար արցունքաբեր գազ, ռետինե փամփուշտներ և լուսարձակող նռնակներ են կիրառել, գրում է France 24-ը։

Ոստիկանությունը հայտարարել է, որ հավաքն անօրինական է, և վաղ երեկոյան շատ մարդիկ հեռացել են։ Մնացած ցուցարարներ մոտակա հանրային այգուց նստարաններ բերել՝ իրենց և ոստիկանության միջև ժամանակավոր պատնեշ կազմելու համար։

Սա տարածաշրջանում Թրամփի կողմից ներգաղթի դեմ ուղղված միջոցառումների դեմ ցույցերի երրորդ օրն է։ Լոս Անջելեսի կենտրոնում գտնվող Մետրոպոլիտեն կալանատան դիմաց ցուցարարները վարկարկել են «Ամո՛թ» և «Տո՛ւն գնա»՝ ուղղված Ազգային գվարդիայի անդամներին, որոնք կանգնել են զենքերով ու վահաններով զինված։ Երեկոյան ոստիկանությունը հայտարարել է անօրինական հավաքի մասին՝ փակելով Լոս Անջելեսի կենտրոնի մի քանի թաղամասեր։

Քալիֆորնիայի դեմոկրատ նահանգապետ Գևին Նյուսոմը կիրակի կեսօրին նամակով խնդրել է Թրամփին հեռացնել գվարդիայի անդամներին՝ նրանց տեղակայումն անվանելով «պետական ​​ինքնիշխանության լուրջ խախտում»։ Սա, կարծես, տասնամյակների ընթացքում առաջին դեպքն է, երբ նահանգի Ազգային գվարդիան ակտիվանում է առանց նահանգապետի խնդրանքի։

Լոս Անջելեսի քաղաքապետ Քարեն Բասը կրկնել է Նյուսոմի մեկնաբանությունները։

«Այն, ինչ մենք տեսնում ենք Լոս Անջելեսում, քաոս է, որը հրահրվում է վարչակազմի կողմից։ Սա մեկ այլ օրակարգի մասին է, սա հանրային անվտանգության մասին չէ»,- ասել է նա մամուլի ասուլիսում:

«Նյուսոմի կողմից ակնհայտ սուտ է՝ պնդել, որ Լոս Անջելեսում խնդիրներ չեն եղել մինչև նախագահ Թրամփի միջամտությունը»,- իր հերթին հայտարարել է Սպիտակ տան ներկայացուցիչ Աբիգեյլ Ջեքսոնը։

Ուրբաթ դաշնային գործակալները ներգաղթյալների էին ձերբակալել Լոս Անջելեսի թաղամասերից մեկում, Home Depot-ի կայանատեղիում և մի քանի այլ վայրերում։ Հաջորդ օրը նրանք բողոքի ակցիա են անցկացրել հիմնականում լատինաամերիկացիներով բնակեցված Փարամաունթում։

Թարգմանությունը՝ Էմմա Չոբանյանի