Քաղաքականություն
06.06.2025 | 15:38
Ամերիկյան Tesla-ի բաժնետոմսերի անկման պատճառով ընկերության սեփականատեր և գործադիր տնօրեն Իլոն Մասկը մեկ օրում կորցրել է 34 միլիարդ դոլար՝ ԱՄՆ նախագահ Դոնալդ Թրամփի հետ վեճից հետո, հայտնում է Bloomberg-ը։
Մասկը, իր հերթին, կորցրել է 34 միլիարդ դոլար, ինչը Bloomberg Billionaires Index-ի կողմից գրանցված երկրորդ ամենամեծ կորուստն է մոլորակի 500 ամենահարուստ մարդկանց ցուցակում։ Մյուս՝ ավելի մեծ կորուստը նույնպես Մասկինն է՝ 2021 թվականի նոյեմբերին։
Էլեկտրական մեքենաների արտադրող Tesla ընկերության կապիտալիզացիան մեկ օրում նվազել է 150 միլիարդ դոլարով։ Հունիսի 5-ին NASDAQ բորսայում սակարկությունների ժամանակ ընկերության բաժնետոմսերը նվազել են 14,26%-ով՝ հասնելով մեկ բաժնետոմսի համար 284,7 դոլարի, իսկ էլեկտրական մեքենաներ արտադրողի շուկայական արժեքը կրճատվել 915,75 միլիարդ դոլարի։
Tesla-ի բաժնետոմսերը NASDAQ բորսայում երեկոյան առևտրի ժամանակ վերականգնել են իրենց կորուստների մի փոքր մասը։ Բաժնետոմսերի գինը բարձրացել է 0,8%-ով՝ հասնելով մեկ բաժնետոմսի համար 286,9 դոլարի։
Իլոն Մասկի անձնական կարողությունը մեկ օրում նվազել է 33,9 միլիարդ դոլարով, քանի որ ընկերության բաժնետոմսերը կազմում են նրա կարողության մեծ մասը։
Չնայած կորուստներին՝ Մասկը նախկինի պես զբաղեցնում է առաջին տեղը աշխարհի ամենահարուստ մարդկանց ցուցակում 335 միլիարդ դոլար կարողությամբ՝ ըստ Bloomberg Billionaires Index-ի։
Axios-ի տվյալներով՝ ԱՄՆ նախագահ Դոնալդ Թրամփի անձնական կարողությունը սկանդալի հետևանքով կրճատվել է մոտ 1 միլիարդ դոլարով։ Trump Media & Technology Group-ի 8% անկումը ԱՄՆ նախագահին արժեցել է մոտ 202 միլիոն դոլար։ Թրամփի եկամտի համար ավելի մեծ հարվածը նրա պաշտոնական meme coin-ի մոտ 10%-ով անկումն է, որը նրան կարող է արժենալ գրեթե 900 միլիոն դոլար։
Թարգմանությունը՝ Էմմա Չոբանյանի
