16.07.2026 | 23:29
Հետաքննությունը պարզել է, որ Ալիևի թոռներն անօրինական կերպով օգտագործում են պաշտոնական լիմուզիններն և անվտանգության մեքենաները
ՌԴ Բելգորոդի մարզում երկաթուղային գծեր են պայթեցվել, ԱԹՍ-ներով հարձակում է գրանցվել դատարանի շենքի վրա
Քաղաքականություն
06.06.2025 | 16:07
ՌԴ Բելգորոդի մարզում Պրոխորովկա-Բելենիխինո հատվածում դիզելային շոգեքարշը դուրս է եկել գծերից։ Այս մասին հայտնել են մարզի ղեկավար Վյաչեսլավ Գլադկովը և «Հարավ-արևելյան երկաթուղի» ընկերության մամուլի ծառայությունը։ Նշվում է, որ մարդիկ չեն տուժել, փոխանցում է Meduza-ն։
Գլադկովի խոսքով՝ երկաթուղային գիծը, նախնական տվյալներով, պայթեցվել է։ Պրոխորովկա-Բելենիխինո հատվածը շուրջ 2,5 ժամ ամբողջությամբ փակ է եղել գնացքների երթևեկության համար, ապա գծերից մեկը բացվել է։
Նահանգապետը նաև Տելեգրամում նշել է, որ Ուկրաինան երկու անգամ անօդաչու թռչող սարքով հարձակվել է Բելգորոդի Օկտյաբրսկի շրջանային դատարանի շենքի վրա։ Նրա խոսքով՝ երկրորդ հարձակումը տեղի է ունեցել, երբ նա ժամանել է դեպքի վայր՝ զննման համար։
«Առաջին հարձակման հետևանքները զննելիս թշնամին դիտավորյալ երկրորդ անգամ հարձակվեց Օկտյաբրսկի շրջանային դատարանի շենքի վրա՝ օգտագործելով ինքնաթիռի տիպի անօդաչու թռչող սարք»,- գրել է Գլադկովը։
Ըստ նրա՝ հարձակումներից մեկի ժամանակ վիրավորվել է այդ պահին անցնող մեքենայի վարորդը։ Տղամարդը հոսպիտալացվել է։ Պայթյունի պատճառով դատարանի շենքի ապակիները կոտրվել են, իսկ ճակատային մասը վնասվել է։
Թարգմանությունը՝ Էմմա Չոբանյանի
