18.02.2026 | 11:11
Ուիթկոֆը հայտարարել է, որ Ուկրաինայում պատերազմի հարցով բանակցություններում «նշանակալի առաջընթաց» է գրանցվել
Վրաստանում ԱՄՆ դեսպան Ռոբին Դանիգանը հրաժարական է տվել
Քաղաքականություն
05.06.2025 | 20:41
Վրաստանում ԱՄՆ դեսպան Ռոբին Դանիգանը հայտարարել է, որ լքում է պաշտոնը։ Նա հավելել է՝ դա իր սեփական որոշումն է, փոխանցում է JAMNews-ը։
«33 տարի Միացյալ Նահանգները ներկայացնող դիվանագետ լինելուց հետո ես անձնական որոշում եմ կայացրել հրաժարական տալ։ Ես միշտ հպարտ կլինեմ այն կարևոր աշխատանքով, որն ամերիկյան կառավարությունն ու նրա թիմը կատարել են թե՛ Վաշինգտոնում, թե՛ այստեղ՝ Թբիլիսիում ԱՄՆ դեսպանատանը՝ բոլոր ազգերի և ժողովուրդների միջև գործընկերությունը ամրապնդելու համար»,- նշել է Դանիգանը։
Նա Վրաստանում ԱՄՆ դեսպանն էր 2023 թվականի հոկտեմբերից։
Դիվանագետը նշել է, որ ինքն ու իր ընտանիքն օրհնված են «վրաց ժողովրդի զարմանալի բարությունն ու ջերմությունը զգալու համար»։
«Որտեղ էլ մենք ուղևորվեինք այս զարմանալիորեն գեղեցիկ երկրում, մեզ միշտ դիմավորել են անգերազանցելի վրացական հյուրընկալությամբ։ Մեզ տպավորում են յուրաքանչյուր վրացու սիրտը, հոգին և ոգևորությունը։ Այսօր, ավելի քան երբևէ, ես վստահ եմ, որ ամերիկացիներին և վրացիներին միավորող հիմնական արժեքները կապահովեն մեր հատուկ գործընկերության և բարեկամության շարունակությունը»,- հայտարարել է նա։
Դանիգանը Վրաստանից կմեկնի հուլիսին, բայց մինչ այդ՝ նա խոստացել է շարունակել «անխոնջ աշխատել երկու երկրների միջև կապերն ամրապնդելու համար»։
Հավելենք, որ Վրաստանի ու ԱՄՆ-ի միջև հարաբերությունների լարվածության ֆոնին՝ վերջերս Թբիլիսիում ԱՄՆ դեսպանատունը հայտնել էր, որ երկրի իշխող «Վրացական երազանք» կուսակցության հիմնադիր և պատվավոր նախագահ Բիձինա Իվանիշվիլին հրաժարվել է դեսպան Ռոբին Դանիգանի հետ հանդիպումից»։
Թարգմանությունը՝ Էմմա Չոբանյանի
