24.06.2026 | 12:10
Ավետիք Չալաբյանը ձերբակալվել է // Պապոյանը ԵՄ դեսպանների հետ արտահանման հարցեր է քննարկել․ ԼՈՒՐԵՐ
Գերմանիայի կանցլեր Ֆրիդրիխ Մերցն առաջին պաշտոնական այցով Վաշինգտոնում է
Քաղաքականություն
05.06.2025 | 21:15
Գերմանիայի կանցլեր Ֆրիդրիխ Մերցը հունիսի լույս 5-ի գիշերն առաջին պաշտոնական այցով ժամանել է Վաշինգտոն։ Նախատեսվում է Սպիտակ տանը նրա հանդիպումը ԱՄՆ նախագահ Դոնալդ Թրամփի հետ՝ չորս շաբաթ առաջ պաշտոնը ստանձնելուց ի վեր առաջին անգամ, գրում է DW-ի ռուսական ծառայությունը։
Մերցի և Թրամփի բանակցությունները կկենտրոնանան Ուկրաինայում պատերազմը դադարեցնելու ջանքերի, աճող արտաքին սպառնալիքներին ՆԱՏՕ-ի արձագանքի և ԱՄՆ-ի ու ԵՄ-ի միջև մաքսային հակամարտության վրա։
Մերցն արդեն հստակեցրել է, որ Վաշինգտոն չի մեկնում որպես «խնդրող» և վստահորեն կպաշտպանի եվրոպական դիրքորոշումները։
DPA-ն հիշեցնում է, որ ավելի վաղ Ուկրաինայի նախագահ Վլադիմիր Զելենսկիի և ՀԱՀ նախագահ Սիրիլ Ռամաֆոսայի՝ Սպիտակ տուն նմանատիպ այցելությունները մթագնվել են Թրամփի հետ բացահայտ բախումներով։
Ֆրիդրիխ Մերցը Թրամփի հետ հանդիպել է միայն մեկ անգամ՝ կարճ ժամանակով, շատ տարիներ առաջ՝ Նյու Յորքում։ Սակայն չորս շաբաթ առաջ պաշտոնը ստանձնելուց ի վեր նա մի քանի անգամ հեռախոսով խոսել է ԱՄՆ նախագահի հետ՝ թե՛ անձամբ, թե՛ ավելի լայն շրջանակով՝ այլ եվրոպացի առաջնորդների հետ, Ուկրաինայի պատերազմի մասին։ Նշվում է, որ Մերցը և Թրամփը այժմ միմյանց դիմում են անունով և պարբերաբար SMS-ներ փոխանակում։
Լրատվամիջոցը գրում է, որ Գերմանիայի կանցլերն ԱՄՆ մայրաքաղաքում կմնա շուրջ 17 ժամ։ Մերցը և Թրամփը հունիսին կհանդիպեն ևս երկու անգամ՝ հունիսի կեսերին Կանադայում կայանալիք G7 գագաթնաժողովին և ամսվա վերջին Նիդերլանդներում կայանալիք ՆԱՏՕ-ի գագաթնաժողովին։
Թարգմանությունը՝ Էմմա Չոբանյանի
