Թրամփը հիացած է ռուսական ավիաբազաների վրա Ուկրաինայի հարձակումից, սակայն մտահոգված է հետագա գործողություններից. Axios

ԱՄՆ նախագահ Դոնալդ Թրամփը կարծում է, որ Ուկրաինայի կողմից շաբաթավերջին իրականացված անակնկալ անօդաչու թռչող սարքերի հարձակումն «ուժեղ» է։ Այս մասին Axios-ին հայտնել են իրավիճակին ծանոթ աղբյուրները՝ հավելելով, սակայն, որ նա նաև մտահոգված է, որ դա կդժվարացնի հրադադարի հասնելու իր ջանքերը։

Լրատվամիջոցը գրում է, որ Ռուսաստանի ռազմավարական ավիաբազաների վրա մանրակրկիտ ծրագրված հարձակման գործողությունը, որն իրականացվել է հազարավոր մղոնների հեռավորությունից, ենթադրում է, որ Ուկրաինան ավելի շատ «խաղաքարտեր» ունի, քան Թրամփը նրանց վերագրել է, բայց նաև գործնականում մարտահրավեր է նետել ՌԴ նախագահ Վլադիմիր Պուտինին՝ սրելու իրավիճակը։

Չորեքշաբթի Թրամփը հայտարարել էր, որ Պուտինն իրեն «շատ վճռականորեն» ասել է՝ կպատասխանի։

«Դա լավ զրույց էր, բայց ոչ այնպիսի զրույց, որը կհանգեցնի անհապաղ խաղաղության»,- նշել է Թրամփը հեռախոսազրույցի մասին։

Ըստ հրապարակման՝ ԱՄՆ նախագահը հրապարակայնորեն լռում է Ուկրաինայի հարձակման վերաբերյալ իր անձնական զգացմունքների մասին, բայց անձնական զրույցում ասել է, որ հիացած է գործողությամբ։

«Բավականին ուժեղ է»,- ասել է Թրամփը իր վստահելի անձանցից մեկին, որին վկայակոչում է Axios-ը։

«Նա կարծում էր, որ դա լավ է», – Թրամփի արձագանքի մասին ասել է երկրորդ աղբյուրը։

Թրամփի խորհրդականներից մեկն ասել է. «Միջազգային տեսանկյունից չիհուահուան իրական վնաս է հասցնում շատ ավելի մեծ շանը»։

Ըստ հարցին ծանոթ մեկ այլ անձի՝ Թրամփը վերջին օրերին իր հետ հանդիպած մարդկանց նաև ասել է, որ անօդաչու թռչող սարքերի հարձակումը, հավանաբար, կստիպի Պուտինին ձեռնարկել զգալի պատասխան գործողություններ։

Աղբյուրը նշել է, որ Թրամփը մտահոգված է, որ այս սցենարը կխոչընդոտի իր դիվանագիտական ​​նախաձեռնությունը, որը հանգեցրել է կողմերի միջև առաջին ուղիղ բանակցություններին երեք տարվա ընթացքում։

Ուկրաինայի հարձակման՝ Սպիտակ տանն անհանգստացրած պատճառներից մեկն այն է, որ դա ուղղված էր հեռահար ռմբակոծիչների դեմ, որոնք կարող են կրել միջուկային զենք և Ռուսաստանի միջուկային զսպման կարևորագույն մաս են կազմում։

«Անօդաչու թռչող սարքերի հարձակումը նրան չզարմացրեց, քանի որ սա այն է, ինչ տեղի է ունենում, երբ պատերազմը շարունակվում է։ Բայց նա մտահոգված է, որ դա կերկարաձգի մարտական ​​գործողությունները։ Նա ցանկանում է, որ մարտական ​​գործողությունները դադարեն, ուստի նրան հիասթափեցնում է, երբ նման հարձակում է լինում»,- հայտարարել է Սպիտակ տան բարձրաստիճան պաշտոնյան։

Այս մտահոգություններից անկախ՝ Թրամփը տպավորված է եղել ուկրաինացիների գործողությամբ, հավելել է Axios-ի աղբյուրը։

Հավելենք, որ նախօրեին Ուկրաինայի անվտանգության ծառայությունը (ՈւԱԾ) հրապարակել էր «Սարդոստայն» գործողության տեսանյութը, որի ընթացքում ուկրաինական անօդաչու թռչող սարքերը հարձակվել էին ՌԴ ռազմավարական ավիացիոն բազաների վրա։ Ըստ հաղորդագրության՝ ռուսական ինքնաթիռների ընդհանուր կորուստները կազմել են 41 միավոր։

Թարգմանությունը՝ Էմմա Չոբանյանի