07.09.2026 | 23:24
Հայկական պտուղ-բանջարեղենի արտահանումը ԱՄԷ․ Պապոյանը քննարկել է ծավալների ավելացումը
Բաքվում շինծու գործերով նիստում Ռուբեն Վարդանյանը միջնորդություն է ներկայացրել մեղադրական եզրակացությունն իր ընտանիքին տրամադրելու հարցով և առարկել դատավորների կազմի դեմ
Քաղաքականություն
03.06.2025 | 22:49
Բաքվի զինվորական դատարանում այսօր կայացել է Արցախի նախկին պետնախարար Ռուբեն Վարդանյանի շինծու գործերով դատական նիստը, որը նախագահել է դատավոր Զեյնալ Աղաևը։ Ըստ ադրբեջանական լրատվամիջոցների՝ նիստի սկզբում Ռուբեն Վարդանյանը դատարանին խնդրել է քրեական գործով մեղադրական եզրակացության պատճենը տրամադրել իր ընտանիքին։ Նրա փաստաբան Ավրաամ Բերմանը պաշտպանել է այդ դիրքորոշումը։
Գլխավոր դատախազի ավագ օգնական Վյուսալ Ալիևը, մեկնաբանելով միջնորդությունը, նշել է, որ Քրեական դատավարության օրենսգրքի համաձայն՝ քրեական հետապնդման ընթացքում նախնական քննության տեղեկությունները, այդ թվում՝ քրեական գործի նյութերը և մեղադրական եզրակացության մեջ նշված տեղեկությունները, քննչական գաղտնիք են կազմում, ուստի դրանց տարածումն անընդունելի է։
Բացի այդ, ընդգծվել է թե Քրեական դատավարության օրենսգիրքը հատուկ նշում է այն անձանց ցանկը, որոնց կարող է հանձնվել մեղադրական եզրակացությունը և դրա պատճենը, և «որ մեղադրյալների ընտանիքի անդամները չեն ներառվում այս ցանկում»։ Ալիևը միջնորդել է մերժել միջնորդությունը։
Խորհրդակցությունից հետո դատարանը որոշել է մերժել միջնորդությունը։
Ռուբեն Վարդանյանը բողոք է ներկայացրել նաև դատավորների կազմի դեմ, քանի որ իր ընտանիքի անդամներին մեղադրական եզրակացությունը չի ուղարկվել, բացի այդ, նախորդ դատավարություններում նրա միջնորդությունները չեն բավարարվել։
Դատավորների կազմի դեմ միջնորդությունը դատարանն առանց քննության է թողել։
Հաջորդ դատական նիստը նշանակվել է հունիսի 10-ին։
Թարգմանությունը՝ Էմմա Չոբանյանի
