12.01.2026 | 23:30
Գերմանիան և Հնդկաստանն ընդլայնում են ռազմական համագործակցությունը
Բաքուն ակնկալում է, որ ԱՄՆ-ը կչեղարկի 907-րդ ուղղումը. Վաշինգտոնում Ադրբեջանի դեսպան
Քաղաքականություն
03.06.2025 | 19:56
Ադրբեջանն ակնկալում է, որ Միացյալ Նահանգները կչեղարկի «Ազատության աջակցության ակտի» 907-րդ ուղղումը, որը խոչընդոտում է երկկողմ հարաբերությունների զարգացմանը։ Այս մասին ամերիկյան Diplomatic Watch-ին տված հարցազրույցում ասել է Վաշինգտոնում Ադրբեջանի դեսպան Խազար Իբրահիմ, փոխանցում են ադրբեջանական լրատվամիջոցները։
Դիվանագետի խոսքով՝ 907-րդ ուղղումն «անարդարացիորեն» է ընդունվել Ադրբեջանի նկատմամբ, ինչը, իբր, խոստովանում են նաև շատ ամերիկացիներ՝ այն ժամանակահատվածում, «երբ ադրբեջանական տարածքները գտնվում էին օկուպացիայի տակ, և տարածաշրջանում տեղի էին ունենում էթնիկ զտումներ (ադրբեջանցիների նկատմամբ)»։
«Սա [նման փոփոխության ընդունումը] հնարավոր է դարձել Կոնգրեսում որոշակի լոբբիստական խմբերի ճնշման արդյունքում»,- ասել է նա։
Ադրբեջանցի դիվանագետը կարծում է, որ Բաքվի և Վաշինգտոնի միջև հարաբերությունները կշարունակեն զարգանալ, «բայց հույս ունի, որ առանց 907-րդ ուղղման»։
«Հաշվի առնելով Ադրբեջանի ռազմավարական դիրքը՝ մեր հարաբերությունները ԱՄՆ-ի հետ կշարունակեն զարգանալ: Ադրբեջանը դերակատարում ունի ԱՄՆ-ի համար կարևոր գրեթե բոլոր հարցերում: Եվ ԱՄՆ-ը կարևոր է Ադրբեջանի համար ոչ միայն այն պատճառով, որ այն համաշխարհային գերտերություն է, այլև այն պատճառով, որ մենք ունենք բազմաթիվ ընդհանուր շահեր և արժեքներ»,- նշել է նա:
Հիշեցնենք, որ վերջերս ԱՄՆ Ներկայացուցիչների պալատի արտաքին հարաբերությունների հանձնաժողովում լսումների ժամանակ կոնգրեսական Ջիմ Կոստան պետքարտուղար Մարկո Ռուբիոյին կոչ էր արել պահպանել «Ազատության աջակցության ակտի» 907-րդ բաժնի սկզբունքները և արգելափակել Ադրբեջանին ռազմական օգնությունը՝ վերահաստատելով Բաքվին պատասխանատվության ենթարկելու և ԱՄՆ քաղաքականության ամբողջականությունը պաշտպանելու կարևորությունը։
Թարգմանությունը՝ Էմմա Չոբանյանի
