09.08.2026 | 10:44
ՀՀ տարածքում ավտոճանապարհներն անցանելի են
Կրեմլը հայտնել է, որ առաջիկայում Պուտին-Թրամփ-Զելենսկի հանդիպում «հազիվ թե հնարավոր է»
Քաղաքականություն
03.06.2025 | 16:03
Ռուսաստանի Դաշնության, ԱՄՆ-ի և Ուկրաինայի նախագահներ Վլադիմիր Պուտինի, Դոնալդ Թրամփի և Վլադիմիր Զելենսկիի եռակողմ հանդիպում առաջիկայում հազիվ թե հնարավոր է։ Այս մասին հայտարարել է ՌԴ նախագահի մամուլի քարտուղար Դմիտրի Պեսկովը, գրում է Ինտերֆաքսը։
«Անկեղծ ասած՝ առաջիկայում դժվար թե։ Նախագահ Պուտինը բազմիցս ընդգծել է իր պատրաստակամությունը ամենաբարձր մակարդակով շփումների հարցում՝ ընդգծելով, որ այդ շփումները պետք է լինեն արդեն իսկ մշակված տեխնիկական մակարդակով, փորձագիտական մակարդակով պայմանավորվածությունների արդյունք։ Հետևաբար, նախագահ Պուտինն աջակցում է այդ շփումներին, բայց կարծում է, որ դրանք պետք է լավ պատրաստված լինեն»,- ասել է Պեսկովը՝ մեկնաբանելով Սպիտակ տան հայտարարությունն այն մասին, որ ԱՄՆ նախագահը բաց է Պուտինի և Զելենսկիի հետ եռակողմ հանդիպման համար։
Հավելենք, որ նախօրեին Թուրքիայի նախագահ Ռեջեփ Թայիփ Էրդողանը վերահաստատել էր բարձր մակարդակի գագաթնաժողով անցկացնելու իր կոչը՝ ասելով, որ Թուրքիան պատրաստ է հյուրընկալել Ռուսաստանի նախագահ Վլադիմիր Պուտինին, Ուկրաինայի նախագահ Վլադիմիր Զելենսկիին և ԱՄՆ նախագահ Դոնալդ Թրամփին՝ Ստամբուլում կամ Անկարայում։
Թարգմանությունը՝ Էմմա Չոբանյանի
