Թուրքիայում ԱՄՆ դեսպանը հայտարարել է Սիրիայում ամերիկյան ռազմաբազաները կրճատելու մասին՝ հասցնելով մեկի

Թուրքիայում ԱՄՆ դեսպան Թոմ Բարաքը հայտարարել է, որ նախագահ Դոնալդ Թրամփը համբերությունը հասել է սահմանին Ուկրաինայի պատերազմի հարցում և տեսնում է, որ Թուրքիան կարևոր դեր է խաղում հակամարտությունը կարգավորելու գործում։ Թուրքական NTV-ին տված հարցազրույցում դիվանագետն ընդգծել է «Թուրքիայի եզակի դիվանագիտական ​​դիրքորոշումը Ռուսաստանի և Ուկրաինայի հետ՝ որպես խաղաղության ջանքերի կարևորագույն գործոն», գրում է Turkiye today-ը:

«Կարծում եմ, որ Թուրքիան առանցքային դեր է խաղում»,- ասել է դեսպանը՝ շարունակվող պատերազմն անվանելով «աղետ բոլորի համար»։

Բարաքը նշել է, որ Թրամփի վարչակազմն ավելի ու ավելի է կենտրոնանում հակամարտության արագ ավարտի վրա:

«Նախագահ Թրամփը հասել է իր համբերության սահմանին. չի կարելի ասել, որ նա շատ համբերատար մարդ է։ Թուրքիան այժմ կարող է միջամտել և վերացնել գործառնական խնդիրները, որպեսզի հնարավոր լինի գագաթնաժողովի մակարդակով հանդիպում անցկացնել առաջնորդների միջև ամենաբարձր մակարդակով։ Եվ ես կարծում եմ, որ մենք կարող ենք լուծել այս խնդիրը բոլորի համար»,- ասել է դեսպանը։

Նշելով, որ չի կարող ուղղակիորեն խոսել ԱՄՆ նախագահ Դոնալդ Թրամփի անունից, Բարաքն ընդգծել է, որ ցանկացած իմաստալից բանակցություն պետք է արդյունքներ տա՝ անվտանգության երաշխիքներով։ Թուրքիան նախկինում առաջարկել էր քառակողմ հանդիպման ձևաչափ, չնայած Ռուսաստանը նախապատվությունը տվել էր Պուտինի և Թրամփի միջև ուղիղ բանակցություններին՝ Ուկրաինայի նախագահ Զելենսկիի մասնակցության փոխարեն։

«Իհարկե, դա պետք է լինի իմաստալից հանդիպում, որտեղ հանդիպման ժամանակ կայացված որոշումները արդյունավետ են և անվտանգությունը երաշխավորված»,- նշել է ԱՄՆ դեսպանը։

Հարցազրույցում անդրադառնալով Սիրիային՝ Թոմ Բարաքը հայտարարել է, որ ԱՄՆ-ը սկսել է կրճատել իր ռազմական ներկայությունն այդ երկրում՝ նպատակ ունենալով, ի վերջո, փակել իր բոլոր բազաները՝ բացառությամբ մեկի։

«Մենք կրճատում ենք մեր ռազմական ներգրավվածությունը։ Մենք ութ բազայից անցել ենք հինգի, ապա՝ երեքի։ Ի վերջո, մենք կանցնենք մեկի»,- ասել է Բարաքը, որը նաև Սիրիայի հարցերով ԱՄՆ հատուկ դեսպանն է։

Նա, միաժամանակ, խոստովանել է, որ Սիրիան դեռևս լուրջ անվտանգության մարտահրավերների է բախվում ժամանակավոր նախագահ Ահմեդ ալ-Շարաայի պաշտոնավարման շրջանում։

Ապրիլին Պենտագոնը հայտարարել էր, որ Միացյալ Նահանգները Սիրիայում իր զորքերի թիվը կիսով չափ կկրճատի՝ հասցնելով 1000-ից պակասի՝ նշելով, որ ԻԼԻՊ-ի ներկայությունը կրճատվել է մինչև «մնացորդների»։

Թարգմանությունը՝ Էմմա Չոբանյանի