08.12.2025 | 23:30
Իլոն Մասկը կոչ է անում «վերացնել» ԵՄ-ն. Եվրահանձնաժողովին արգելվել է X-ում գովազդներ տեղադրել՝ 120 միլիոն եվրո տուգանքից հետո
Ճապոնիայի վարչապետը կլուծարի խորհրդարանը, եթե ընդդիմությունը անվստահություն հայտնի
Քաղաքականություն
03.06.2025 | 10:36
Ճապոնիայի վարչապետ Շիգերու Իշիբան կարող է լուծարել Ներկայացուցիչների պալատը՝ արտահերթ խորհրդարանական ընտրություններ անցկացնելու համար, եթե ընդդիմադիր կուսակցությունը անվստահության նախաձեռնություն ներառի խորհրդարանի օրակարգ․ գրում է Kyodo լրատվական գործակալությունը՝ հղում անելով կառավարության իր աղբյուրներին:
Եթե անվստահության հարց ներկայացվի և հաստատվի, ապա վարչապետը պետք է լուծարի ստորին պալատը և հրաժարական տա 10 օրվա ընթացքում։
Աղբյուրը նշել է, որ իշխող Լիբերալ-դեմոկրատական կուսակցության նախագահ Իշիբան իր օգնականներին ասել է, որ «Ներկայացուցիչների պալատի լուծարումը տեսանելի կլինի, եթե Ճապոնիայի Սահմանադրական Դեմոկրատական կուսակցությունը անվստահության հարց ներկայացնի»։
Եթե ստորին պալատը լուծարվի, կարող է առաջանալ ստորին և վերին պալատների ընտրությունները միաժամանակ անցկացնելու հնարավորություն։ Խորհրդականների պալատի ընտրությունները նախատեսված են այս ամռանը, մինչդեռ Ներկայացուցիչների պալատի ընտրությունները կարող են անցկացվել ցանկացած պահի՝ մինչև 2028 թվականի աշուն։
Այնուամենայնիվ, աղբյուրը նշել է, որ կառավարության որոշ անդամներ զգուշավոր են ստորին պալատի հնարավոր լուծարման հարցում, հատկապես հիմա, երբ Ճապոնիան բախվում է այնպիսի մարտահրավերների, ինչպիսիք են գնաճը (այդ թվում՝ բրնձի բարձր գները) և ԱՄՆ նախագահ Դոնալդ Թրամփի առաջ քաշած սակագնային քաղաքականությունը։
Թարգմանությունը՝ Անահիտ Խաչատրյանի
