Ուկրաինան ՌԴ-ին է տրամադրել այն երեխաների ցուցակը, որոնց պահանջում է վերադարձնել

Ուկրաինական պատվիրակությունը Ստամբուլում կայացած բանակցությունների ժամանակ ռուսական կողմին է հանձնել հարյուրավոր ուկրաինացի երեխաների ցուցակ, որոնց պահանջում է վերադարձնել։ Այս մասին հայտնել է Ուկրաինայի նախագահի գրասենյակի ղեկավար Անդրեյ Երմակը։

«Այսօր Ստամբուլում բանակցությունների ժամանակ ուկրաինական կողմը պաշտոնապես ռուսական կողմին է հանձնել  ուկրաինացի երեխաների ցուցակը, որոնք պետք է վերադարձվեն: Խոսքը հարյուրավոր երեխաների մասին է, որոնց Ռուսաստանն անօրինական կերպով արտաքսել, բռնի կերպով տեղափոխել կամ պահում է ժամանակավորապես օկուպացված տարածքներում։ Ուկրաինացի երեխաների վերադարձն արդար և երկարատև խաղաղության անբաժանելի մասն է և վստահության հիմնական տարր, մտադրությունների անկեղծության առաջին փորձությունը: Մենք սպասում ենք պատասխանի: Գնդակը Ռուսաստանի դաշտում է»,- գրել է Երմակը Տելեգրամում։

Ռուսական պետական ​​ՏԱՍՍ գործակալության աղբյուրը հայտնել է, որ այսօրվա բանակցությունների ընթացքում Մոսկվան և Կիևը «մանրամասն քննարկել են փոխանակումները», որոնց մասին պաշտոնապես կհայտարարվի ավելի ուշ։

Թուրքիայի արտաքին գործերի նախարարությունը հայտնել է, որ Ռուսաստանի և Ուկրաինայի միջև բանակցություններն ավարտվել են «ոչ բացասական»։

Լրատվամիջոցները հաղորդում են, որ բանակցությունների ավարտից հետո Ուկրաինայի պաշտպանության նախարար Ռուստեմ Ումերովն է լրագրողների հետ զրուցել։ Նա կարդացել է հայտարարություն, որից հետևում է, որ Ռուսաստանը և Ուկրաինան գերիների նոր փոխանակում կանցկացնեն:

Հավելենք, որ Ստամբուլում հանդիպումը տևել է մեկ ժամից ավելի։

Թարգմանությունը՝ Էմմա Չոբանյանի