Լավրովն ու Ռուբիոն Ստամբուլում այսօր կայանալիք ռուս-ուկրաինական բանակցություններից առաջ հեռախոսազրույց են ունեցել

ԱՄՆ պետքարտուղար Մարկո  Ռուբիոն և ՌԴ ԱԳ նախարար Սերգեյ Լավրովը հունիսի 2-ին Ստամբուլում կայանալիք ռուս-ուկրաինական բանակցություններից առաջ հեռախոսազրույց են ունեցել։

«Պետքարտուղար Մարկո Ռուբիոն այսօր Ռուսաստանի խնդրանքով զրուցել է ՌԴ արտաքին գործերի նախարար Լավրովի հետ: Պետքարտուղար Ռուբիոն վերահաստատել է նախագահ Թրամփի կոչը՝ շարունակել Ռուսաստանի և Ուկրաինայի միջև ուղիղ բանակցությունները՝ երկարատև խաղաղության հասնելու համար»,- ասվում է ԱՄՆ Պետքարտուղարության մամուլի խոսնակ Թեմի Բրյուսի տարածած հաղորդագրության մեջ;

ՌԴ ԱԳՆ հաղորդագրության համաձայն՝ կողմերը քննարկել են ուկրաինական ճգնաժամի քաղաքական կարգավորման նախաձեռնությունները, այդ թվում՝ հունիսի 2-ին Ստամբուլում ռուս-ուկրաինական ուղիղ բանակցությունների վերսկսման ծրագրերը:

«Սերգեյ Լավրովը և Մարկո Ռուբիոն նաև մտքեր են փոխանակել ուկրաինական ճգնաժամի քաղաքական կարգավորման վերաբերյալ տարբեր նախաձեռնությունների, այդ թվում՝ հունիսի 2-ին Ստամբուլում ռուս-ուկրաինական ուղիղ բանակցությունների վերսկսման ծրագրերի վերաբերյալ»,- ասվում է հաղորդագրության մեջ։

Հավելենք, որ այսօր Ստամբուլում տեղի կունենա ՌԴ-ի և Ուկրաինայի  պատվիրակությունների բանակցությունների հերթական փուլը։ Ըստ թուրքական ԱԳՆ աղբյուրների՝ Ուկրաինայի և Ռուսաստանի պատվիրակությունների հանդիպումը կայանալու է Չիրագան պալատում տեղական ժամանակով ժամը 13:00-ին։ ՌԴ նախագահի օգնական Վլադիմիր Մեդինսկիի գլխավորած ռուսական պատվիրակությունը նախօրեին արդեն ժամանել է Ստամբուլ։

ՌԴ-ի ու Ուկրաինայի նախորդ բանակցությունները Ստամբուլում տեղի էին ունեցել մայիսի 16-ին։

Թարգմանությունը՝ Էմմա Չոբանյանի