Սերժ Սարգսյանը նման խայտառակ տապալումներից հետո պետք է հրաժարական տա ՀՀԿ նախագահի պաշտոնից․ Սուրեն Զոլյան․ ՏԵՍԱՆՅՈՒԹ

Վարչապետ Նիկոլ Փաշինյանի հրաժարականը պետք է տեղի ունենար դեռևս այս տարվա մայիս-հունիս ամիսներին, և չեմ կարծում, որ այն ժամանակ դրա համար ստեղծված պայմանները բարենպաստ չէին։ Եթե այն ժամանակ վարչապետը հրաժարական տար, մենք կհասցնեինք վերանայել և՛ Ընտրական օրենսգիրքը, և՛ ընտրական հանձնաժողովների կազմը, իսկ քաղաքական ուժերն էլ կհասցնեին վերադասավորվել, բայց քանի որ դա չեղավ, մենք ստիպված ենք գնալ ֆորսմաժորային լուծումների։ Այս մասին Factor.am-ի հետ զրույցում ասաց քաղաքագետ Սուրեն Զոլյանը։

Վերջինս նշեց, որ այս ֆորսմաժորային իրավիճակով պայմանավորված էլ լիովին կանխատեսելի էր, օրինակ, ԲՀԿ-ի ղեկավար Գագիկ Ծառուկյանի՝ վարչապետի հետ հուշագրի ստորագրումը։ «Դրանք բիզնես պրոյեկտներ են։ «Բարգավաճ Հայաստան» կուսակցությունը, փաստորեն չհաղթահարեց «դուխով»-ը, ստիպված է լինելու դիմել այլ լծակների։ Բիզնեսը միշտ էլ խոցելի է, և եթե խառնում են բիզնեսն ու քաղաքականությունը, մեկը պետք է տուժի։ Տվյալ դեպքում և՛ Գագիկ Ծառուկյանը, և՛ նրա նման մյուս գործարար պատգամավորները շատ արագ համաձայնեցին, քանի որ նրանք փորձառու առևտրականներ են վերջիվերջո, նրանց համար այդ գործարքներն ավելի նախընտրելի են, քան քաղաքական բախումների գնալը»,- ասաց Զոլյանը։ Անդրադառնալով ԱԺ ՀՀԿ խմբակցության տարածած հայտարարությանը, որով ՀՀԿ-ն խոստացավ վարչապետի թեկնածու չառաջադրել, Սուրեն Զոլյանը հարցադրում հնչեցրեց․ «Դուք չեք առաջադրում, բայց դուք ունե՞ք ձեր թեկնածուն։ Եթե ունենային, վերջին պահին չէին հայտարարի, նախօրոք կասեին, մոտավորապես այնպես, ինչպես արվում էր Սերժ Սարգսյանի ժամանակ։ Եթե քաղաքական ուժը, ոչ թե օրինագծի տակ դակելու համար հավաքվածները, թեկնածու չի առաջադրում, պետք է որպես քաղաքական ուժ ինքնալուծարվելու մասին հարցը բարձրացնի»։

Քաղաքագետը նաև նշեց, որ Սերժ Սարգսյանը նման խայտառակ տապալումներից հետո պետք է հրաժարական տար։ «Այդ խայտառակ պարտություններից հետո, որոնք տեղի ունեցան, կուսակցության առաջին դեմքերը պետք է հրաժարական տային, իսկ քանի որ դա տեղի չի ունենում, ցույց է տալիս, որ ՀՀ-ում չկա կուսակցություն, և դա վերաբերւմ է և՛ ՀՀԿ-ին, և՛ ԲՀԿ-ին, և՛ ՔՊ-ին և՛ մյուսներին։

Կա կուսակցության առաջնորդ, և կուսակցության ծրագիրն այն է, որն այդ պահին կասի կուսակցության առաջնորդը»,- կարծիք հայտնեց քաղաքագետը։ Հարցին էլ՝ արդյոք վերջին քաղաքական վերադասավորումները լուրջ դիրքերի հեռանկար թողնում են երկրորդ նախագահ Ռոբերտ Քոչարյանին, Սուրեն Զոլյանը պատախանեց․ «Ռոբերտ Քոչարյանի համար այդ դիրքերը ստեղծվել են ներկայիս իշխանությունների կողմից և նրա կալանավորումը, մեղադրանքները նրան բերեցին քաղաքական դաշտ և դարձրին հակահերոս, և այս առումով ինքն առկա է՝ անկախ իր կամքից։ Իսկ դիրքերն ամրացնելը կախված է այն քարոզչությունից, որը տարվում է․ եթե մեկին դարձնում են գլխավոր հակահերոսը, բնական է, որ նրա շուրջը կլինի որոշակի կոնսոլիդացիա։ Այսօրվա իշխանություններից դժգոհողները կգնան ոչ թե ՀՀԿ, ԲՀԿ կամ ՀՅԴ, այլ այն կողմ, որտեղ հստակ կտեսնեն այս իշխանության հակառակորդին»։

Աղավնի Սուքիասյան

Մանրամասները՝ տեսանյութում։