01.09.2026 | 17:08
Ռուբեն Ռուբինյանն ու Օլիվիե Դըկոտինյին քննարկել են Հայաստան-Ֆրանսիա ռազմավարական գործընկերության զարգացումը
Իրանը հայտնել է Վաշինգտոնի հետ միջուկային բանակցություններում առաջընթացի մասին
Քաղաքականություն
31.05.2025 | 19:14
Իրանի Ատոմային էներգիայի կազմակերպության ղեկավար Մոհամմադ Էսլամին հայտարարել է, որ որոշ առաջընթաց է գրանցվել Իրանի և ԱՄՆ-ի միջև ընթացող անուղղակի բանակցություններում։ Այս մասին տեղեկացնում է Mehr գործակալությունը։
Նա միևնույն ժամանակ մերժել է «զրո հարստացման» գաղափարը՝ անվանելով այդպիսի քննարկումները պարզ հռետորաբանություն, որը հիմնականում նախատեսված է սիոնիստական համայնքի համար։
Արևմտյան երկրները պարբերաբար կասկածներ են հայտնում, որ Իրանը ձգտում է զարգացնել միջուկային զենքի կարողությունները՝ իր ոխերիմ թշնամու՝ Իսրայելի զինանոցին հակազդելու համար։
Ավելի վաղ Իրանի արտգործնախարար Աբբաս Արաղչին վերահաստատել էր, որ Իրանը դեմ է միջուկային զենքի ստեղծմանը. «Եթե խնդիրը միջուկային զենքն է, այո, մենք նույնպես այս տեսակի զենքը անընդունելի ենք համարում»։
Արաղչին նշել էր, որ Իրանը բազմիցս ընդգծել է, որ որևէ պարագայում չի դրսևորելու նույնիսկ նվազագույն ճկունություն ուրանի հարստացման իրավունքի հարցում։
Ավելի վաղ AFP-ն, հղում անելով Ատոմային էներգիայի միջազգային գործակալության (ԱԷՄԳ) գաղտնի զեկույցին, տեղեկացրել էր, որ Իրանը արագացրել է մինչև 60% հարստացված ուրանի պաշարների արտադրությունը, որը մոտենում է միջուկային զենք արտադրելու համար անհրաժեշտ 90% մակարդակին։
Իրանն ու ԱՄՆ-ը ուրբաթ օրը հինգերորդ փուլով շարունակել էին բանակցությունները Թեհրանի միջուկային ծրագրի շուրջ՝ Իտալիայի մայրաքաղաք Հռոմում։ Նախորդ փուլերի պես, բանակցություններում կողմերի պատվիրակություններին գլխավորում էին Իրանի արտգործնախարար Աբբաս Արաղչին և ԱՄՆ նախագահ Դոնալդ Թրամփի հատուկ բանագնաց Ստիվ Ուիթքոֆը։
Հավելենք, որ ԱՄՆ-Իրան նախորդ բանակցությունները տեղի էին ունեցել ապրիլի 26-ին Օմանի Մասկատ քաղաքում։ Կողմերը մինչ այդ էլ արդեն երկու անգամ խորհրդակցություններ էին անցկացրել Օմանում և Հռոմում։ Անցյալ ամիս ԱՄՆ նախագահ Դոնալդ Թրամփը նամակ էր ուղարկել Իրանի գերագույն հոգևոր առաջնորդ Այաթոլահ Ալի Խամենեիին՝ ուղղակի միջուկային բանակցությունների կոչ անելով: Նամակի պատասխանն Իրանը փոխանցել է Օմանի միջոցով: Այս նամակագրությունից հետո ապրիլի 12-ին Օմանում կայացել էին առաջին անուղղակի բանակցությունները Իրանի և ԱՄՆ-ի միջև:
