Քաղաքականություն
31.05.2025 | 15:05
Շաբաթ օրը թուրքական իշխանությունները Ստամբուլում հրամայել են ձերբակալել ընդդիմադիր կուսակցությունների մի քանի անդամների և խուզարկել են ընդդիմությանը պատկանող գրասենյակներ․ գրում է Reuters-ը։
Ստամբուլի քաղաքապետ Էքրեմ Իմամօղլուն, որը նաև Թուրքիայի նախագահ Ռեջեփ Թայիփ Էրդողանի հիմնական քաղաքական մրցակիցն է և որոշ հարցումների համաձայն՝ առաջատար դիրքեր է զբաղեցնում, այս տարվա մարտ ամսին բանտարկվել է՝ կոռուպցիայի և ահաբեկչական խմբավորմանը օգնելու մեղադրանքներով։ Իմամօղլուն, սակայն, մեղադրանքները չի ընդունում։
Շաբաթ օրը պետական «Անադոլու» գործակալությունը և NTV մասնավոր հեռուստաընկերությունը հաղորդել են, որ չորս առանձին կոռուպցիոն գործերի շրջանակում ձերբակալության հրամաններ են տրվել 47 մարդու նկատմամբ, որոնցից 28-ը արդեն իսկ կալանավորվել է։
Նրանց թվում են ԺՀԿ նախկին պատգամավոր Այքութ Էրդողդուն, Ստամբուլի մի շարք շրջանների քաղաքապետներ, Ստամբուլի քաղաքապետարանի կամ դրա հետ առնչվող կառույցների բարձրաստիճան պաշտոնյաներ, ինչպես նաև Ադանայի նահանգում գտնվող երկու շրջանների քաղաքապետներ։
Հաղորդվում է, որ ոստիկանությունը նաև խուզարկել է Ավջըլար, Բյույուքչեքմեջե, Գազիոսմանփաշա, Սեյդան և Ջեյհան համայնքների շենքերը, որոնց քաղաքապետները ձերբակալվել են հետաքննության շրջանակներում։
NTV-ի հաղորդմամբ՝ ձերբակալությունների նոր ալիքին ի պատասխան՝ Ժողովրդա-հանրապետական կուսակցությունը արտակարգ նիստ է հրավիրել Ստամբուլում։
Որոշ արևմտյան երկրներ, իրավապաշտպան խմբեր և Թւրքիայի Ժողովրդա-հանրապետական կուսակցությունը բազմիցս հայտարարել են, որ գործողությունները հակաժողովրդավարական են և ուղղված են ընդդիմության ընտրական հեռանկարները խափանելուն։ Իմամօղլուն և նրա Ժողովրդա-հանրապետական կուսակցությունը հայտարարել են, որ նրա դեմ որևէ կոնկրետ ապացույց չկա։
Հարցումները ցույց են տալիս, որ Իմամօղլուի նկատմամբ հանրային աջակցությունն աճել է նրա ձերբակալությունից հետո՝ մեծացնելով նրա առավելությունը Էրդողանի նկատմամբ և ամրապնդելով այն տեսակետը, որ նա կլինի Էրդողանի գլխավոր մրցակիցը հաջորդ նախագահական ընտրություններում, որոնք նախատեսված են մինչև 2028 թվականը։
Թարգմանությունը՝ Անահիտ Խաչատրյանի
