04.08.2026 | 23:08
Հաշտարարների պալատի կրթական ծրագիրը ստացել է պետական երաշխավորում
Բաքվում շինծու գործերով նիստում անդրադարձ է եղել 2016թ․ ապրիլիյան պատերազմին և 2020թ․ Տավուշի մարտերին
Քաղաքականություն
29.05.2025 | 22:05
Բաքվի զինվորական դատարանում այսօր տեղի է ունեցել Արցախի ղեկավարների, տարբեր պաշտոնյաների շինծու գործերով հերթական դատական նիստը՝ դատավոր Զեյնալ Աղաևի նախագահությամբ։
Ըստ ադրբեջանական լրատվամիջոցների՝ գլխավոր դատախազի ավագ օգնական Վյուսալ Ալիևը հարցաքննել է, այսպես կոչված, «տուժածներին», անդրադարձել հետաքննության երկու գլուխների վերաբերյալ այլ փաստաթղթեր, որոնք վերաբերում են, իբր, «Ադրբեջանում քաղաքացիական բնակչության դեմ կատարված ահաբեկչական և այլ հանցագործություններին»։
Նշվում է, թե այդպիսով սկսվել է 2016 թվականին՝ պայմանականորեն «ապրիլյան մարտեր» (խոսքն Ապրիլյան քառօրյա պատերազմի մասին է) անվանվող ժամանակահատվածում կատարված «հանցագործությունների», ինչպես նաև 2020 թվականի հուլիսին «Թովուզի (Տավուշյան մարտեր) մարտեր» անվանվող ժամանակահատվածում կատարված «ահաբեկչական գործողությունների և այլ հանցագործությունների» «տուժողների» հարցաքննությունը։
«Տուժող» Աբբաս Ալլահվերդիևն իր ցուցմունքում նշել է, թե իր բնակության վայրի Թափ Գարագոյունլու գյուղը պարբերաբար հրետանային և այլ զենքերի միջոցով հրետանային կրակի տակ է եղել հայերի կողմից։ Նա ասել է, թե 2016 թվականի ապրիլի 2-ի գիշերը «հայերը կրակ են բացել Մարտակերտից», իսկ ապրիլի 3-ի երեկոյան «հայկական զինված ուժերի կողմից արձակված արկերից մեկն» ընկել է իր տան բակում և պայթել։ Արդյունքում նա վիրավորում է ստացել։
Ալլահվերդիևը պատասխանել է նաև գյուղի սահմանների վերաբերյալ Արցախի ՊԲ հրամանատարի նախկին տեղակալ Դավիթ Մանուկյանի հարցերին։
«Տուժող» Էլվին Քարիմովն էլ պատմել է, որ «հայկական զինված ուժերը բազմիցս ծանր հրետանային կրակի են ենթարկել իր Ալխանլի գյուղը։ 2016 թվականի ապրիլի 4-ին, ժամը 16:00-ի սահմաններում, երբ ինքը դուրս է եկել տնից, արկն ընկել է հարևանի բակում և պայթել՝ վիրավորելով իրեն» ։
Արցախի նախկին ԱԳ նախարար Դավիթ Բաբայանն էլ հարցրել է, թե քանի մարդ է ապրում գյուղում։ «Տուժողը» նշել է, որ չգիտի գյուղի բնակիչների ճշգրիտ թիվը։
Նիստի ընթացքում Արցախի ԱԺ նախագահ Դավիթ Իշխանյանն ասել է, որ ցանկանում է ծանոթանալ մայիսի 26-ին Դավիթ Բաբայանի մասնակցությամբ տեղի ունեցած դատական նիստի արձանագրությանը։ Դատավոր Զեյնալ Աղաևը նշել է, որ կստեղծվեն պայմաններ՝ հայերենի թարգմանչի մասնակցությամբ դատական նիստերի արձանագրություններին ծանոթանալու համար։
Հաջորդ դատական նիստը նշանակվել է մայիսի 30-ին։
Թարգմանությունը՝ Էմմա Չոբանյանի
