Պայթյունից զոհվել է Ստավրոպոլի փոխքաղաքապետ, Ուկրաինայի պատերազմի մասնակից Զաուր Գուրցիևը․ ՏԵՍԱՆՅՈՒԹ

Ստավրոպոլում պայթյունի հետևանքով զոհվել է փոխքաղաքապետ, Ուկրաինայի պատերազմի մասնակից Զաուր Գուրցիևը: Այս մասին հայտնել է Ստավրոպոլի երկրամասի նահանգապետ Վլադիմիր Վլադիմիրովը, գրում է Current time-ը։

Նրա խոսքով՝ Գուրցիևը մահացել է «Չեխովի փողոցում գիշերային միջադեպի հետևանքով», սակայն չի մանրամասնել, թե ինչ միջադեպի մասին է խոսքը։ Նահանգապետը հավելել է, որ «քննարկվում են բոլոր վարկածները, այդ թվում՝ Ուկրաինայից նացիստների մասնակցությամբ ահաբեկչական հարձակման կազմակերպումը»։

Ստավրոպոլի քաղաքապետ Իվան Ուլյանչենկոն, իր հերթին, գիշերը ժամը 1-ի սահմաններում հայտնել է, որ Չեխովի փողոցի 85/19 հասցեում գտնվող բնակելի շենքի մոտ «պայթյուն է տեղի ունեցել», երկու տղամարդ զոհվել է։ Բնակելի շենքի մոտ կայանված մի քանի մեքենաներ վնասվել են։ Mash և Shot տելեգրամ ալիքների տվյալներով՝ ենթադրաբար, նռնակ է պայթեցվել։

Ռուսաստանի ուժայինների հետ սերտ Baza տելեգրամ ալիքը պնդում է, որ Զաուր Գուրցիևին պայթեցրած և սպանած պայթուցիկ սարքը գտնվել է 29-ամյա Նիկիտա Պենկովի մոտ։

Ստավրոպոլի երկրամասի Քննչական կոմիտեն քրեական գործ է հարուցել սպանության (ՌԴ Քրեական օրենսգրքի 105-րդ հոդվածի 2-րդ մասի «ա», «ե» կետեր) և պայթուցիկ սարքերի ապօրինի պահպանման (ՌԴ Քրեական օրենսգրքի 222.1 հոդվածի 1-ին մաս) հոդվածներով։

2024 թվականի մայիսին՝ Ուկրաինայում պատերազմից վերադառնալուց հետո, 34-ամյա Գուրցիևը դարձել է «Հերոսների ժամանակը» նախագահական ծրագրի մասնակից, որը նպատակ ուներ «հատուկ ռազմական գործողության» (Ռուսաստանն այսպես է անվանում Ուկրաինայում պատերազմը) մասնակիցների շրջանում առաջնորդություն պատրաստել: Սեպտեմբերին Գուրցիևը նշանակվել էր Ստավրոպոլի ղեկավարի առաջին տեղակալի պաշտոնում։ Ծրագրի կայքում ասվում է, որ Գուրցիևը ղեկավարել է ռուսական զորքերի կողմից Մարիուպոլը գրավելու գործողության օդադեսանտային մասը, ինչպես նաև ստացել է մի շարք պարգևներ, այդ թվում՝ «Ավդեևկայի համար»։

Թարգմանությունը՝ Էմմա Չոբանյանի