Զելենսկին հայտնել է Մեդինսկիի և Ումերովի հեռախոսազրույցի մասին՝ գերիների խոշոր փոխանակումից հետո

Ուկրաինայի նախագահ Վլադիմիր Զելենսկին Բեռլինում Գերմանիայի կանցլեր Ֆրիդրիխ Մերցի հետ բանակցություններից հետո խոսել է ռազմագերիների խոշոր փոխանակումից հետո ուկրաինական և ռուսական պատվիրակությունների ղեկավարների միջև հեռախոսազրույցի մասին, գրում է BBC-ի ռուսական ծառայությունը։

Մայիսի 16-ին Ստամբուլում կայացած բանակցություններում ռուսական պատվիրակությունը գլխավորում էր ՌԴ նախագահի օգնական Վլադիմիր Մեդինսկին, իսկ ուկրաինական պատվիրակությունը՝ պաշտպանության նախարար Ռուստեմ Ումերովը:

Հանդիպման միակ իրական արդյունքը գերիների փոխանակումն էր՝ «1000-ը 1000-ի դիմաց» բանաձևով, որն ավարտվեց մայիսի 25-ին: Հայտնի չէ, թե երբ կկայանա բանակցությունների երկրորդ փուլը:

«Մենք իսկապես սպասում էինք, որ նրանք կհայտարարեն իրենց «օրակարգի»՝ հրադադարի, ապա առաջնորդների հանդիպման ծրագրի մասին։ Մենք սա սպասում էինք նույնիսկ փոխանակումից առաջ։ Հետո մեզ ասացին, որ օրակարգը կամ հուշագիրը կհայտնվի փոխանակումից անմիջապես հետո։ Բայց փոխանակումից հետո մենք ոչինչ չենք ստացել։ Մեր կողմը կապ է հաստատել ռուսների հետ՝ պաշտպանության նախարարը զանգահարել է պարոն Մեդինսկիին։ Նրանք վստահեցրին՝ «Կլինի, կլինի»։ Բայց մենք ոչինչ չենք ստացել։ Մենք դիմել ենք ԱՄՆ-ին՝ նրանք նույնպես սպասում են։ Բոլորը սպասում են։ Միգուցե չարժե սպասել, պետք է անցնել լուրջ քայլերի»,- ասել է Զելենսկին Բեռլինում Մերցի հետ համատեղ մամուլի ասուլիսում։

Կրեմլի խոսնակ Դմիտրի Պեսկովը էլ հայտարարել է, որ Ռուսաստանի և Ուկրաինայի հուշագրերի նախագծերը շուտով հայտնի կդառնան, որից հետո խոսք կգնա բանակցությունների նոր փուլի մասին։

ՌԴ ԱԳ նախարար Սերգեյ Լավրովն էլ այսօր հայտնել էր, որ Ռուսաստանի և Ուկրաինայի միջև ուղիղ բանակցությունների հաջորդ փուլի ամսաթիվը կհայտարարվի առաջիկայում։

Թարգմանությունը՝ Էմմա Չոբանյանի