13.01.2026 | 10:05
Լարս ավտոճանապարհը փակ է բոլոր տեսակի տրանսպորտային միջոցների համար
ԱՄՆ-ն շարունակում է աջակցել խաղաղության խթանմանը․ Մարկո Ռուբիոն անդրադարձել է ՀՀ-ի ու Ադրբեջանի միջև հարաբերությունների կարգավորմանը
Քաղաքականություն
28.05.2025 | 10:32
ԱՄՆ-ն շարունակում է աջակցել տարածաշրջանում խաղաղության ջանքերին։ Այս մասին ասվում է ԱՄՆ պետքարտուղար Մարկո Ռուբիոյի՝ Ադրբեջանի Անկախության օրվան նվիրված շնորհավորական հայտարարության մեջ։
«Մենք աջակցում ենք Ադրբեջանի ինքնիշխանությանը, անկախությանը և տարածքային ամբողջականությանը։ Միացյալ Նահանգները շարունակում է աջակցել տարածաշրջանում խաղաղության և կայունության խթանման ջանքերին, որոնք կարևոր են Հարավային Կովկասի բարգավաճման համար, և մենք նշում ենք այս տարի Ադրբեջանի և Հայաստանի միջև խաղաղության պայմանագրի տեքստի վերաբերյալ ձեռք բերված համաձայնությունը։ Մենք նաև ճանաչում ենք Ադրբեջանի աճող կարևորությունը որպես էներգակիրների մատակարար և տրանսպորտային հանգույց»,- նշել է ԱՄՆ պետքարտուղարը։
Նա ընդգծել է, որ վերջին 33 տարիների ընթացքում կառուցված գործընկերությունը շարունակում է առաջ մղել անվտանգության, էներգետիկ համագործակցության և տնտեսական աճի ընդհանուր շահերը։
«Միացյալ Նահանգները շարունակում է հանձնառու մնալ Ադրբեջանում հիմնարար ազատությունների, այդ թվում՝ մամուլի ազատության աջակցությանը՝ համապատասխան Ադրբեջանի սահմանադրությանը։ Մենք անհամբեր սպասում ենք մեր համագործակցության խորացմանը և համատեղ աշխատանքին՝ Ադրբեջանի և ամբողջ տարածաշրջանի համար խաղաղ, բարգավաճ ապագա ապահովելու համար»,-ասվում է Ռուբիոյի հայտարարության մեջ։
Հիշեցնենք, որ ԱՄՆ Ներկայացուցիչների պալատի արտաքին հարաբերությունների հանձնաժողովում լսումների ժամանակ Մարկո Ռուբիոն հայտարարել էր, որ ՀՀ-ի և Ադրբեջանի միջև հակամարտության իրական վտանգ կա, որը փորձում են կանխել։
Թարգմանությունը՝ Էմմա Չոբանյանի
