08.09.2026 | 10:31
Պապոյանը Դուբայում քննարկել է հայկական կառուցապատման ոլորտը միջազգային հարթակներում ներկայացնելու հնարավորությունները
Հայաստանի և Ֆրանսիայի ԱԳ նախարարների մասնակցությամբ տեղի է ունեցել նամականիշի մարման արարողություն
Քաղաքականություն
26.05.2025 | 20:54
«Երևանյան երկխոսության» միջազգային 2-րդ ֆորումի շրջանակներում Հայաստանի և Ֆրանսիայի ԱԳ նախարարների մասնակցությամբ տեղի է ունեցել նամականիշի մարման արարողություն: Այս մասին տեղեկացնում են ՀՀ ԱԳՆ-ից։
Մարվել և շրջանառության մեջ է դրվել մեկ նամականիշով գեղաթերթիկ՝ նվիրված «Երևանյան երկխոսություն 2025» թեմային:
Գեղաթերթիկի մարումն իրականացրել են Արտաքին գործերի նախարար Արարատ Միրզոյանը, Բարձր տեխնոլոգիական արդյունաբերության նախարարի տեղակալ Գևորգ Մելիքսեթյանը, Ֆրանսիայի Հանրապետության Եվրոպայի և արտաքին գործերի նախարար Ժան-Նոել Բարոն, «Հայփոստ» ՓԲԸ-ի գլխավոր գործադիր տնօրեն Շուշան Ալեքսանյանը, «Դիտորդ հետազոտական հիմնադրամի» նախագահ Սամիր Սարանը (Հնդկաստան), «Կազիմիր Պուլասկի» հիմնադրամի հիմնադիր և նախագահ Զբիգնև Պիսարսկին (Լեհաստան):
Նամականիշի վրա պատկերված է Ջիմ Թորոսյանի և Սարգիս Գուրզադյանի նախագծով կառուցված հուշարձանի վերնամասը, որը նմանեցված է ուրարտական ժամանակշրջանին բնորոշ աշտարակներին, իսկ կենտրոնում գտվում է կենաց ծառ խորհրդանշող սոսու տերևը (ծառը): Նամականիշի վրա նաև պատկերված է Երևանյան երկխոսության լոգոտիպը և «ԵՐԵՎԱՆՅԱՆ ԵՐԿԽՈՍՈՒԹՅՈՒՆ» գրառումը՝ հայերեն և անգլերեն լեզուներով:
Գեղաթերթիկի վրա պատկերված են Երևան քաղաքի խորհրդանիշերից մի քանիսը՝ «Մատենադարան» Մեսրոպ Մաշտոցի անվան հին ձեռագրերի գիտահետազոտական ինստիտուտի շենքը, «Մայր Հայաստան» արձանը, Ալ. Սպենդիարյանի անվան օպերայի և բալետի ազգային ակադեմիական թատրոնի շենքը, Սասունցի Դավթի արձանը:
Գեղաթերթիկի ներքևի հատվածում նշված է «ԵՐԵՎԱՆՅԱՆ ԵՐԿԽՈՍՈՒԹՅՈՒՆ» գրառումը՝ հայերեն և անգլերեն լեզուներով:
«Երևանյան երկխոսություն»-ը միջազգային համաժողով է, որն ամեն տարի Երևանում է հյուրընկալում բարձրաստիճան պաշտոնյաների, միջազգային կառույցների և ակադեմիական շրջանակների ներկայացուցիչների ամբողջ աշխարհից՝ ծավալելու թեմատիկ տարբեր ուղղություններով քննարկումներ:
