ՀԱՄԱՍ-ի աղբյուրը հայտնել է, որ խմբավորումն ընդունել է Գազայում հրադադարի առաջարկը. Ուիթկոֆը հերքել է տեղեկությունը

Պաղեստինյան ՀԱՄԱՍ-ը համաձայնել է Գազայի հատվածում ԱՄՆ նախագահ Դոնալդ Թրամփի Մերձավոր Արևելքի հարցերով հատուկ բանագնաց Սթիվ Ուիթկոֆի հրադադարի առաջարկին։ Այս մասին հայտնում են AFP-ն և Reuters-ը։

ՀԱՄԱՍ-ի աղբյուրը հայտնել է, որ խմբավորումն ընդունել է միջնորդների կողմից ներկայացված Գազայի հրադադարի առաջարկը, որը, ըստ հաղորդումների, ենթադրում է 10 պատանդի ազատ արձակում երկու խմբով և 70-օրյա հրադադար։

«ՀԱՄԱՍ-ը համաձայնել է ԱՄՆ դեսպան Սթիվ Ուիթկոֆի նոր առաջարկին, որը շարժումը ստացել է միջնորդներից»,- AFP-ին ասել է աղբյուրը՝ հավելելով, որ «հրադադարի ընթացքում կսկսվեն բանակցություններ մշտական ​​​​հրադադարի վերաբերյալ՝ ամերիկյան երաշխիքներով»։

Axios-ի թղթակից Բարաք Ռավիդը, սակայն, հաղորդում է, որ իր հետ զրույցում Ուիթկոֆը հերքել է ՀԱՄԱՍ-ի համաձայնության մասին հայտարարությունը։

«Այն, ինչ ես տեսել եմ ՀԱՄԱՍ-ից, հիասթափեցնող է և լիովին անընդունելի»,- ասել է ամերիկացի պաշտոնյան։

Ըստ լրագրողի՝ Ուիթկոֆն իրեն ասել է, որ Իսրայելը կհամաձայնվի ժամանակավոր հրադադարի և պատանդների հետ կապված գործարքի, որը թույլ կտա վերադարձնել ողջ մնացածների և մահացածների կեսին, «կհանգեցնի էական բանակցությունների՝ մշտական ​​հրադադարի ճանապարհ գտնելու համար, որտեղ ինքը համաձայնել է նախագահել»։

«Այդ գործարքը սեղանին է։ ՀԱՄԱՍ-ը պետք է ընդունի դա», – նշել է Ուիթկոֆը։

Մայիսի 18-ին Axios-ը, հղում անելով աղբյուրներին, հաղորդել էր Ուիթկոֆի առաջարկի մասին, որը փոխանցվել է երկու կողմերին։ Նեթանյահուն դրական է պատասխանել, «սակայն բազմաթիվ պայմաններով և վերապահումներով»։

Միաժամանակ, Իսրայելի պաշտպանության բանակը նույն օրը հայտարարել էր «լայնածավալ ցամաքային գործողությունների» մեկնարկի մասին Գազայի հյուսիսային և հարավային հատվածներում։

Թարգմանությունը՝ Էմմա Չոբանյանի