13.01.2026 | 20:27
Կանխարգելվել է մոտ 15.000.000 ՀՀ դրամի հափշտակության դեպք. ՆԳՆ կիբեռոստիկանություն
Մակրոնը, Մերցն ու Տուսկը դատապարտել են Վրաստանում «ժողովրդավարությունից նահանջը»
Քաղաքականություն
26.05.2025 | 18:16
Գերմանիայի կանցլեր Ֆրիդրիխ Մերցը, Ֆրանսիայի նախագահ Էմանուել Մակրոնը և Լեհաստանի վարչապետ Դոնալդ Տուսկը քննադատել են Վրաստանի կառավարության գործողությունները, որոնք, ըստ եվրոպացի առաջնորդների, խաթարել են երկրի ժողովրդավարական ինստիտուտները, գրում է DW-ի ռուսական ծառայությունը։
Մայիսի 26-ին Վրաստանի անկախության օրվա առթիվ տարածված համատեղ հայտարարության մեջ Մերցը, Մակրոնը և Տուսկը դատապարտել են «վրացական իշխանությունների բոլոր գործողությունները, որոնք հանգեցնում են ժողովրդավարության հետընթացի և քաղաքացիական հասարակության, լրատվամիջոցների և կառավարության քննադատների վրա հարձակումների»։
Նրանք համերաշխություն են հայտնել վրաց ժողովրդին և վերահաստատել իրենց «անսասան աջակցությունը Վրաստանի ինքնիշխանությանը և տարածքային ամբողջականությանը»։
«Մենք աջակցում ենք վրաց ժողովրդի ժողովրդավարական և եվրոպական ձգտումներին։ Այս ձգտումներն արտացոլում են եվրոպական ընտանիքի մաս կազմելու ցանկությունը»,- ասվում է հայտարարության մեջ։
Նշվում է, որ «պետք է ապահովվի խոսքի և հավաքների ազատությունը, պետք է հետաքննվեն չափազանց բռնության մասին հաղորդագրությունները, անհրաժեշտ է փոփոխություններ մտցնել օրենքներում, որոնք հակասում են եվրոպական չափանիշներին և պետք է վերսկսվի անհրաժեշտ բարեփոխումների գործընթացը»։
Եվրոպացի երեք առաջնորդներ կոչ են արել Վրաստանի իշխանություններին վերսկսել երկխոսությունն ընդդիմության և քաղաքացիական հասարակության հետ։
«Վրաստանի ժողովուրդը չպետք է զրկվի երկրի եվրոպական ուղու հետ կապված հնարավորություններից»,- ընդգծել են նրանք։
Թարգմանությունը՝ Էմմա Չոբանյանի
