05.12.2025 | 23:32
ԱԱ․ Բաչկովը հաղթել է ժամկետից շուտ, Մաշակարյանը և Հովհաննիսյանը ևս շարժվում են առաջ
Ադրբեջանում արգելափակել են ռուսական «Ցարգրադ» հեռուստաալիքի կայքը
Քաղաքականություն
26.05.2025 | 18:39
Ռուսական «Ցարգրադ» («Царьград») հեռուստաալիքի կայքն Ադրբեջանում անհասանելի է դարձել։ Արգելափակումը տեղի է ունեցել այն բանից հետո, երբ ադրբեջանական իշխանամերձ Minval-ի գլխավոր խմբագիր Էմիլ Մուստաֆաևը դիմել է Ադրբեջանի Թվային զարգացման և տրանսպորտի նախարարություն՝ կոչ անելով միջոցներ ձեռնարկել հեռուստաալիքի կողմից «Ադրբեջանի դեմ ուղղված կեղծ և սադրիչ տեղեկատվության տարածման կապակցությամբ»։
Բողոքարկման արդյունքում ռեսուրսի մուտքը սահմանափակվել է։
«Այս քայլը դարձել է հստակ օրինակ այն բանի, թե ինչպես է երկրի ներսում ճնշվելու քարոզչական ռեսուրսների գործունեությունը։ Սա նաև պետք է դաս ծառայի այլ քարոզիչների համար, ովքեր հույս ունեն կեղծ նարատիվներ տարածել Ադրբեջանի դեմ և ազդել երկրի հասարակական կարծիքի վրա»,- գրում է լրատվամիջոցը։
Հիշեցնենք, որ ավելի վաղ Բաքուն ՌԴ-ին մեղադրել էր ադրբեջանական իշխանամերձ լրատվամիջոցների դեմ կիբերհարձակումների համար։
Միաժամանակ, Ադրբեջանի իշխանությունները վերջերս փակել են Բաքվում «Ռուսական տունը», Sputnik-Ադրբեջան լրատվական գործակալությունը՝ ռուս-ադրբեջանական հարաբերություններում լարվածության ֆոնին։
Ադրբեջանի և Մոսկվայի հարաբերություններում լարվածություն էր առաջացել ադրբեջանական օդանավի կործանումից հետո։ Բաքվից Գրոզնի թռչող AZAL-ի օդանավը վթարի էր ենթարկվել 2024թ-ի դեկտեմբերի 25-ին Ղազախստանի Ակտաու քաղաքի մոտ։ Օդանավում գտնվող 67 անձանցից 38-ը մահացել էր։ Ավիաղետի համար Ադրբեջանը մեղադրում է ռուսական կողմին՝ պահանջելով պաշտոնապես ներողություն խնդրել և պատասխանատվություն ստանձել։
Թարգմանությունը՝ Էմմա Չոբանյանի
