Մալթան և Ֆրանսիան պատրաստվում են ճանաչել Պաղեստինի անկախությունը․ ԶԼՄ-ներ

Մալթայի վարչապետ Ռոբերտ Աբելան հայտարարել է, որ իր երկիրը մոտ ժամանակներում կճանաչի Պաղեստինի անկախությունը, գրում է Times of Malta-ն։

Մալթայում կա պաղեստինյան դեսպան, և այս երկիրը 2024 թվականին սատարել է ՄԱԿ-ի Գլխավոր վեհաժողովի բանաձևը, որով Պաղեստին պետությանը տրվում է լիիրավ անդամակցության իրավունք, սակայն մինչ այժմ Մալթան պաշտոնապես չի ճանաչել Պաղեստին պետությունը։

Աբելայի խոսքերով՝ ըստ Times of Malta-ի, համապատասխան հայտարարությունը նախատեսվում է անել հունիսի 20-ին՝ Սաուդյան Արաբիայի և Ֆրանսիայի կողմից՝ ՄԱԿ-ի աջակցությամբ կազմակերպված միջազգային համաժողովի ժամանակ։ Պարբերականի փոխանցմամբ՝ Մալթայի իշխանությունների ներկայացուցիչները հասկացրել են, որ իրենց երկիրը միակը չի լինի, որը համաժողովի ընթացքում կհայտարարի Պաղեստինի ճանաչման մասին։

Axios պարբերականի տվյալներով՝ Պաղեստինի անկախությունը հունիսին պատրաստվում է ճանաչել նաև Ֆրանսիան։ 2025 թվականի ապրիլին France 5 հեռուստաալիքին տված հարցազրույցում Ֆրանսիայի նախագահ Էմանուել Մակրոն ասել էր, որ նման հայտարարություն կարող է արվել «մոտակա ամիսներին»։ Այդ ժամանակ ՀԱՄԱՍ ահաբեկչական կազմակերպությունը հայտարարեց, որ Ֆրանսիայի որոշումը կարևոր քայլ է, մինչդեռ Իսրայելի ԱԳ նախարար Գիդեոն Սաարը դատապարտել էր Պաղեստինի՝ «կեղծ պետության» ճանաչումը՝ այն անվանելով «ահաբեկչության համար պարգև»։ Այդ մասին գրել էր RFI-ն։

Հիշեցնենք՝ 2024 թվականին Պաղեստինի անկախությունը ճանաչել են Նորվեգիան, Իռլանդիան, Իսպանիան, Սլովենիան և Հայաստանը։