12.01.2026 | 23:30
Գերմանիան և Հնդկաստանն ընդլայնում են ռազմական համագործակցությունը
Նիդերլանդները ավարտում է Ուկրաինային վերջին F-16 կործանիչների փոխանցումը
Քաղաքականություն
25.05.2025 | 21:16
Նիդերլանդները ավարտում է Ուկրաինային F-16 կործանիչների փոխանցումը. վերջին ինքնաթիռը կփոխանցվի մայիսի 26-ին։ Այս մասին հայտնել է Նիդերլանդների պաշտպանության նախարար Ռուբեն Բրեկելմանսը WNL op Zondag հաղորդման ընթացքում՝ կիրակի, մայիսի 25-ին։
«Սա նշանակում է, որ բոլոր 24 խոստացված կործանիչները շուտով կլինեն Ուկրաինայում»,-ասել է նախարարը։ Ինքնաթիռների փոխանցումից բացի, Նիդերլանդները պատրաստում է նաև օդաչուներ և տեխնիկներ, ինչպես նաև Ուկրաինայի հետ կիսվում են իրենց ռազմական դոկտրիններով, ընդգծել է Բրեկելմանսը՝ կրկին կոչ անելով դաշնակիցներին շարունակել Ուկրաինային հնարավորինս լայն աջակցություն ցուցաբերել։
Նիդերլանդները առաջին երկրներից մեկն էր, որը համաձայնեց Ուկրաինային փոխանցել իր F-16 կործանիչները, մասնավորապես այն պատճառով, որ երկրի բանակը անցում է կատարում նոր մոդելի՝ F-35-ի վրա։ Առաջին կործանիչները Կիևին փոխանցվել էին անցած տարվա հուլիսին։
Բացի Նիդերլանդներից, Ուկրաինային F-16 կործանիչներ տրամադրելու խոստում են տվել նաև Դանիան, Բելգիան և Նորվեգիան։ 2025 թվականի մարտին հայտնի դարձավ, որ Բելգիան հետաձգել է առաջին ինքնաթիռների փոխանցումը մինչև 2026 թվականը՝ պատճառաբանելով պահեստամասերի պակասը և օդաչուների սակավությունը։
Բացի այդ, Ուկրաինային արևմտյան արտադրության կործանիչներ է տրամադրում նաև Ֆրանսիան, սակայն ոչ թե ամերիկյան F-16, այլ սեփական արտադրության՝ Mirage-2000 ինքնաթիռներ։
