27.06.2026 | 18:14
ՍԴ-ն պետք է գնահատի ոչ թե խախտումների առկայությունը, այլ արդյոք դրանք կարող էին ազդել արդյունքի վրա․ Գալյան․ ՏԵՍԱՆՅՈւԹ
Սիրիայի իշխանությունները պնդում են, որ Ասադի օրոք 8 միլիոն մարդ ենթարկվել է հսկողության
Քաղաքականություն
25.05.2025 | 19:13
Սիրիայի նախագահ Բաշար ալ-Ասադի կառավարման տարիներին երկրի հետախուզական ծառայությունները հսկել, փնտրել կամ կազմել են մոտ ութ միլիոն մարդու վերաբերյալ դոսյեներ, կիրակի՝ մայիսի 25-ին, հայտարարել է նոր կառավարության Ներքին գործերի նախարարությունը, փոխանցում է DW-ն։
«Խոսքը Սիրիայի ժողովրդի գրեթե մեկ երրորդի մասին է, որի վերաբերյալ գաղտնի ծառայությունները և այլ գործակալություններ դոսյեներ ունեին», – գործակալության ներկայացուցչի խոսքերն է մեջբերում dpa գործակալությունը։
Նրա խոսքով՝ ավելի քան ութ միլիոն մարդ քաղաքական պատճառներով հայտնվել է գաղտնի ծառայությունների հսկողության տակ։ Սա վերաբերում է ցուցարարներին և ռեժիմի հակառակորդներին, որոնց հաճախ մեղադրում էին «ահաբեկչության» համար, ձերբակալում, կալանավորում կամ հսկողության տակ էին պահում։
Հիշեցնենք՝ 2024 թվականի վերջին Սիրիայում իսլամիստական ընդդիմության զինված ուժերը՝ սուննիական «Հայաթ Թահրիր ալ-Շամ» (HTS) խմբավորման գլխավորությամբ, կարողացան գրավել երկրի խոշորագույն քաղաքները, այդ թվում՝ մայրաքաղաք Դամասկոսը, և տապալել բռնապետ Բաշար ալ-Ասադի ռեժիմը։ Նա և իր հայրը Սիրիան կառավարել են կես դարից ավելի։ Ասադն ինքը և իր ընտանիքը փախան Ռուսաստան։
Սիրիայի նոր նախագահ Ահմեդ ալ-Շարաան հայտարարել է արևմտյան երկրների հետ հարաբերություններ հաստատելու իր ցանկության մասին։ ԱՄՆ-ն և ԵՄ-ն մայիսին սկսեցին վերացնել երկրի դեմ սահմանված որոշ պատժամիջոցներ՝ «այդ երկրում քաղաքական անցմանը աջակցելու համար»։
