19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Ղազախստանն ադրբեջանական օդանավի կործանման գործի քննությունից մանրամասներ է հայտնել
Քաղաքականություն
23.05.2025 | 14:47
Ղազախստանի Ակտաու քաղաքի օդանավակայանի մերձակայքում «Ադրբեջանական ավիաուղիներ»-ի (AZAL) օդանավի կործանման գործով հետաքննությունը գտնվում է երկրորդ փուլում, որի ընթացքում փորձագետներն ուսումնասիրում են հավաքված նյութերը։ Այս մասին լրագրողներին հայտնել է Ղազախստանի տրանսպորտի նախարար Մարատ Կարաբաևը, գրում են ադրբեջանական լրատվամիջոցները։
«Ընդհանուր առմամբ, հետաքննությունը բաժանված է մի քանի փուլերի: Առաջին փուլը համապատասխան նյութերի հավաքագրումն է: Այդ փուլն ավարտված է, այժմ հավաքված նյութերի ուսումնասիրության փուլն է: Մենք այժմ գտնվում ենք հետազոտության փուլում»,- ասել է Կարաբաևը:
Նա նաև նշել է, որ ղազախ մասնագետներն ու միջազգային փորձագետներն այցելել են Ադրբեջանի և Ռուսաստանի օդանավակայաններ՝ վթարի հետաքննության համար։
«ICAO-ի (Միջազգային քաղաքացիական ավիացիայի կազմակերպություն) ներկայացուցիչներն այցելել են Բաքու, եղել են Գրոզնիում, ինչպես նաև Դոնի Ռոստովում»,- ասել է Կարաբաևը՝ հավելելով, որ ուսումնասիրության համար անհրաժեշտ բոլոր նյութերը ներկայում Ղազախստանում են։
Ավելի վաղ էլ Ղազախստանի Գլխավոր տրանսպորտային դատախազությունը հայտնել էր, որ AZAL օդանավի կործանման նախաքննության տվյալները հրապարակման ենթակա չեն։
Վերջերս էլ ադրբեջանական իշխանամերձ լրատվամիջոցները գրել էին, որ վթարից 5 ամիս է անցել, սակայն Ռուսաստանը հետաքննության ընթացքի վերաբերյալ որևէ կոնկրետ տեղեկատվություն չի տրամադրել։ Նշվում է, որ «այս 5 ամիսների ընթացքում Ռուսաստանի կողմից քննչական գործողություն չի իրականացվում, վթարի համար մեղավոր և պատասխանատու անձանցից ոչ ոք չի կալանավորվել»։
Ըստ ադրբեջանական աղբյուրների՝ վերջերս Ադրբեջանի և Ռուսաստանի իրավապահ մարմինների միջև այս հարցով հերթական նամակագրությունն է տեղի ունեցել, սակայն արդյունք չկա, Բաքուն ռուսական կողմից սպասում է կոնկրետ քայլերի:
Հիշեցնենք, որ Բաքվից Գրոզնի թռչող «Ադրբեջանական ավիաուղիներ» ընկերության Embraer 190 ինքնաթիռը կործանվել էր 2024 թվականի դեկտեմբերի 25-ի առավոտյան՝ Ղազախստանի արևմուտքում գտնվող Ակտաու քաղաքի մոտակայքում։ Ավիաընկերության տվյալներով՝ ինքնաթիռում եղել է 62 ուղևոր և անձնակազմի հինգ անդամ։ Ղազախստանի արտակարգ իրավիճակների նախարարության տվյալներով՝ 29 մարդ ողջ է մնացել։ Օդանավի կործանումը Ադրբեջանի և Մոսկվայի հարաբերություններում լարվածություն էր առաջացրել։ Ավիաղետի համար Ադրբեջանը մեղադրում է ռուսական կողմին՝ պահանջելով պաշտոնապես ներողություն խնդրել և պատասխանատվություն ստանձել։
Թարգմանությունը՝ Էմմա Չոբանյանի
