08.09.2026 | 15:28
Մարիաննա Ղահրամանյանը՝ ԱԺ ՄԻՊ և հանրային հարցերի մշտական հանձնաժողովի փոխնախագահ
Ռուսական հարձակման հետևանքով Ուկրաինայի Պոլտավայի մարզում ձեռնարկություն է ավերվել
Քաղաքականություն
23.05.2025 | 16:15
Ուկրաինայի Պոլտավայի մարզի Կրեմենչուգ քաղաքային համայնքում ռուսական անօդաչու թռչող սարքի հարձակման հետևանքով ավերվել է ձեռնարկություններից մեկի շենքը։ Այս մասին հայտնել է տարածաշրջանային ռազմական վարչակազմի ղեկավարի պաշտոնակատար Վլադիմիր Կոգուտը, փոխանցում է Current time-ը։
Նրա խոսքով՝ հրդեհ է բռնկվել, որը տեղայնացվել է Արտակարգ իրավիճակների պետական ծառայության աշխատակիցների կողմից։ Պայթյունի ալիքը վնասել է յոթ մասնավոր տնային տնտեսություն։ Մեկ մարդ վիրավորվել է, սակայն հրաժարվել է հոսպիտալացվել։
Կրեմենչուգ համայնքում վնասվել են էլեկտրահաղորդման գծեր, ինչի հետևանքով ավելի քան 100 իրավաբանական անձինք և գրեթե 1800 տնային սպառողներ մնացել են առանց էլեկտրաէներգիայի։ Պոլտավայի շրջանում ավելի քան 270 բաժանորդ էլեկտրաէներգիա չունի։ Մասնագետներն աշխատում են էլեկտրամատակարարումը վերականգնելու ուղղությամբ։
Հաղորդվում է նաև, որ առավոտյան ռուսական ուժերը Կուպյանսկում կառավարվող ավիառումբով հարվածել են կոմունալ ծառայությունների աշխատակիցներին։ Նրանցից մեկը մահացել է, հայտնել է Խարկովի շրջանային վարչակազմի ղեկավար Օլեգ Սինոգուբովը։
Նա նշել է, որ երկու տղամարդ է վիրավորվել, որոնք հոսպիտալացվել են ծանր վիճակում։ Ավելի ուշ նրանից մեկը մահացել է հիվանդանոցում։
Թարգմանությունը՝ Էմմա Չոբանյանի
