Ռուբիոն հայտարարել է, որ ԱՄՆ-ը քննարկում է Վրաստանի «հակաամերիկյան կառավարության» դեմ միջոցները․ Թբիլիսին արձագանքել է

ԱՄՆ պետքարտուղար Մարկո Ռուբիոն Դոնալդ Թրամփի իշխանության գալուց ի վեր առաջին անգամ մեկնաբանել է Վրաստանում իրավիճակը։ Ներկայացուցիչների պալատում արտաքին հարաբերությունների հանձնաժողովում լսումների ժամանակ նա հայտարարել է, որ Վաշինգտոնում քննարկվում են վրացական իշխանությունների դեմ տարբեր միջոցառումներ։ Ներկայացուցիչների պալատի անդամ Ջո Ուիլսոնի հարցին ի պատասխան՝ նա օգտագործել է «հակաամերիկյան կառավարություն» արտահայտությունը Վրաստանի ներկայիս ղեկավարությանը բնութագրելու համար, գրում է Эхо Кавказа-ն։

«Շնորհակալ եմ Թրամփի վարչակազմին Վրաստանում հակաամերիկյան «Վրացական երազանքի» ռեժիմի նկատմամբ կոշտ դիրքորոշման համար։ Նրանք կեղծել են  հոկտեմբերի 26-ի ընտրությունները։ Նրանք քրեականացրին Ամերիկայի հետ կապերը, վռնդեցին ամերիկյան ընկերություններին, արգելափակեցին առևտուրը և հասանելիությունը Միջին միջանցքում գտնվող օգտակար հանածոներին՝ փաստացի վաճառելով Վրաստանը Չինաստանի կոմունիստական ​​կուսակցությանը։ Նրանք բազմիցս զրպարտել են նախագահ Թրամփին և ամերիկյան ղեկավարությանը»,- հայտարարել է Ջո Ուիլսոնը, որը «Վրացական երազանքի» կառավարության կոշտ քննադատ է։

Նա նշել է, թե Ռոնդելիի հիմնադրամի մասնակցությամբ հրապարակվել է զեկույց, որտեղ խոսվում է Վրաստանում այժմ հաստատված Չինաստանի կոմունիստական ​​կուսակցության վերահսկողության մասին ու հավելել, որ 200 օր անընդմեջ «ազատատենչ վրացիները հերոսաբար դուրս են եկել փողոցներ՝ փաթաթված ամերիկյան դրոշներով, ձեռքերին՝ [ԱՄՆ] նախագահին ուղղված պաստառներ»։

«Ձեր ղեկավարությամբ ի՞նչ է արվելու, որպեսզի Պետքարտուղարությունն իրական գործողություններ ձեռնարկի հակաամերիկյան «Վրացական երազանքի» դեմ՝ վրաց ժողովրդի շահերից ելնելով»,- ասել է կոնգրեսականը։

«Միացյալ Նահանգների նպատակը մեր ազգային շահերին հետևելն է, ուստի մենք ինքներս մեզ հարցնում ենք՝ մեր շահերի՞ց է բխում աշխարհի կարևոր տարածաշրջանում հակաամերիկյան կառավարություն ունենալը։ Եթե ոչ, մենք կձեռնարկենք համապատասխան միջոցներ՝ ապահովելու համար, որ այդ կառավարությունը կրի ծախսերը։ Այդ հարցը ներկայում քննարկվում է, և մենք փնտրում ենք հնարավոր միջոցառումներ ու լրացուցիչ տարբերակներ»,- պատասխանել է Ռուբիոն։

Վրաստանի ԱԳ նախարար Մակա Բոճորիշվիլին արձագանքել է Ռուբիոյի հայտարարություններին։

«Ես չեմ կարծում, որ Վրաստանի կառավարության վերաբերյալ նման գնահատականի համար որևէ հիմք կա։ Մենք ունեցել ենք և շարունակում ենք ունենալ շատ լավ համակարգային համագործակցություն Միացյալ Նահանգների հետ, երբ խոսքը վերաբերում է համակարգային համագործակցությանը, և չկա որևէ  հիմք՝ կասկածի տակ դնելու այս համագործակցությունը։ 30 տարի շարունակ Վրաստանը եղել է Միացյալ Նահանգների հուսալի գործընկերը այս տարածաշրջանում։ Վրաստանի կառավարությունը բազմիցս հայտարարություններ է արել և մտահոգություն հայտնել ԱՄՆ նախորդ վարչակազմի օրոք հարաբերությունների վատթարացման վերաբերյալ։ Մենք բազմիցս հայտնել ենք մեր պատրաստակամությունը և հույսը, որ նոր վարչակազմի օրոք այդ հարաբերությունները որակապես կփոխվեն և կիրականացվեն Վրաստանի և ԱՄՆ ազգային շահերին համապատասխան»,- ասել է նա՝ նշելով, որ «ԱՄՆ վարչակազմը դեռևս ձևավորված դիրքորոշում չունի Վրաստանի վերաբերյալ»։

Հիշեցնենք, որ ավելի վաղ էլ Վրաստանի վարչապետ Իրակլի Կոբախիձեն բաց նամակով դիմել էր ԱՄՆ նախագահ Դոնալդ Թրամփին և փոխնախագահ Ջեյ Դի Վենսին՝ մտագոհություն հայտնելով Վրաստանի իրավիճակի մասով ԱՄՆ լռության  վերաբերյալ։

Թարգմանությունը՝ Էմմա Չոբանյանի