Քաղաքականություն
22.05.2025 | 12:57
Իրանի ԱԳՆ խոսնակ Էսմայիլ Բաղային հաստատել է Օմանի արտաքին գործերի նախարարի առաջարկը՝ Իրան-ԱՄՆ անուղղակի բանակցությունների հինգերորդ փուլն անցկացնել մայիսի 23-ին Հռոմում, գրում է Mehr գործակալությունը։
Բաղային նաև հայտարարել է՝ իրանական բանակցային թիմը վճռական և անսասան է Իրանի ժողովրդի խաղաղ միջուկային էներգիայից օգտվելու իրավունքներն ու շահերը հետապնդելու հարցում, ներառյալ՝ ուրանի հարստացումը և ճնշող պատժամիջոցների վերացումը, և որևէ ջանք կամ նախաձեռնություն չի խնայի՝ այդ նպատակներին հասնելու համար։
Հավելենք, որ Օմանի արտաքին գործերի նախարար Սեյիդ Բադր Ալբուսաիդին X-ում գրել է, որ «Իրան-ԱՄՆ բանակցությունների 5-րդ փուլը տեղի կունենա Հռոմում այս ուրբաթ՝ մայիսի 23-ին»։
Իրանի և ԱՄՆ-ի պատվիրակությունները Թեհրանի միջուկային ծրագրի և ամերիկյան պատժամիջոցների վերացման վերաբերյալ անուղղակի բանակցությունների չորս փուլ են անցկացրել Օմանի մայրաքաղաք Մասկատում և Իտալիայի մայրաքաղաք Հռոմում։ Վերջին հանդիպումը տեղի է ունեցել մայիսի 11-ին Մասկատում։
Միաժամանակ, Իրանն ու երեք եվրոպական երկրներ՝ Ֆրանսիան, Գերմանիան և Մեծ Բրիտանիան, որոնք միասին հայտնի են որպես E3, նախորդ ուրբաթ Ստամբուլում բարձր մակարդակի հանդիպում են անցկացրել՝ քննարկելու Իրան-ԱՄՆ բանակցությունների վերջին զարգացումները։ Դա Իրանի և E3-ի միջև 2024 թվականի սեպտեմբերից ի վեր նման բանակցությունների վեցերորդ փուլն էր, որի ընթացքում քննարկվել են Թեհրանի միջուկային ծրագիրը և պատժամիջոցների մեղմացումը։
Թարգմանությունը՝ Էմմա Չոբանյանի
