06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
Ադրբեջանում իշխանությունները ցանկանում են AbzasMedia-ի լրագրողներին 11-12 տարով ազատազրկել
Քաղաքականություն
21.05.2025 | 22:39
Ադրբեջանական AbzasMedia գործով տեղի ունեցած հերթական դատական նիստի ժամանակ պետական մեղադրողը պահանջել է իրական դատավճիռներ նշանակել մեղադրյալ լրագրողների համար։ Ադրբեջանական լրատվամիջոցների հաղորդմամբ՝ դատախազ Ռաուֆ Մալիշովը պահանջել է AbzasMedia-ի տնօրեն Ուլվի Հասանլիին, հետաքննող լրագրող Հաֆիզ Բաբալին և «Ազատություն ռադիոկայանի»-ի լրագրող Ֆարիդ Մեհրալիզադեին դատապարտել 12 տարվա ազատազրկման։ Իսկ ահա գլխավոր խմբագիր Սևինջ Վագիֆքըզին, համակարգող Մուհամմեդ Կեկալովին, ինչպես նաև լրագրողներ Նարգիզ Աբսալամովային և Էլնարա Գասիմովային առաջարկվում է դատապարտել 11 տարի ժամկետով ազատազրկման։
Պետական հարկային ծառայության ներկայացուցիչը պահանջել է քաղաքացիական հայցի բավարարում՝ 64 հազար մանաթի չափով։
Դատախազը նաև առաջարկել է բռնագրավել Ֆարիդ Մեհրալիզադեի Kia մեքենան, 40 հազար եվրոն, որը, ըստ պնդումների, հայտնաբերվել է Abzas Media-ի գրասենյակում, ինչպես նաև ավելի քան 20 հազար մանաթ՝ բանկային հաշիվներում։
Փաստաբաններին մինչև հունիսի 10-ը ժամանակ է տրվել՝ պաշտպանությունը ներկայացնելու համար։
Հաջորդ դատական նիստը տեղի կունենա հունիսի 10-ին։
2023 թվականի նոյեմբերի 20-ից ի վեր Ադրբեջանում ձերբակալվել է AbzasMedia-ի 6 աշխատակից, որոնք ներգրավված են կոռուպցիայի դեմ պայքարի հետաքննություններում։ Անցյալ տարվա մայիսին նույն գործով ձերբակալվել է Ֆարիդ Մեհրալիզադեն։ Սկզբում բոլորին մեղադրում էին մաքսանենգության մեջ։ 2024 թվականի օգոստոսին AbzasMedia-ի գործով մեղադրանքները խստացվել են։
Տեղական և միջազգային իրավապաշտպան կազմակերպությունները կարծում են, որ ձերբակալությունները քաղաքական դրդապատճառներ ունեն և կոչ են անում ազատ արձակել լրագրողներին ու վերացնել նրանց առաջադրված բոլոր մեղադրանքները։
ԱՄՆ կոնգրեսական Ջեյմս Մաքգովերը նամակ է գրել Ադրբեջանի նախագահ Իլհամ Ալիևին և խորը մտահոգություն հայտնել «Ազատություն» ռադիոկայանի լրագրող և տնտեսագետ Ֆարիդ Մեհրալիզադեի շարունակական բանտարկության վերաբերյալ։
«Խորապես անհանգստացնող է, որ նա շարունակում է մնալ կալանքի տակ։ Ես կոչ եմ անում նրան անհապաղ ազատ արձակել, որպեսզի նա կարողանա վերամիավորվել կնոջ և դստեր հետ»,- գրել է Կոնգրեսի Թոմ Լանթոսի անվան մարդու իրավունքների հանձնաժողովի համանախագահ Մաքգովերնը։
Կոնգրեսականը նշել է, որ չնայած Ֆարիդ Մեհրալիզադեն կալանավորվել է AbzasMedia-ի դեմ հարուցված քրեական գործի շրջանակում, հստակ նշվել է, որ նա որևէ համագործակցություն չի ունեցել այդ լրատվական կազմակերպության հետ։ Իր նամակում կոնգրեսականը շեշտել է, որ Ֆարիդը դատարանում ենթարկվել է բռնության և նվաստացման։
«Հուսով եմ, որ Ադրբեջանը կհետևի միջազգային արդար դատավարության չափանիշներին, կհանի Ֆարիդի դեմ անհիմն մեղադրանքները և անմիջապես ու անվերապահորեն ազատ կարձակի նրան»,- գրել է կոնգրեսականը։
Հավելենք, որ Abzas Media-ն հիմնականում զբաղվում է Ադրբեջանի իշխանությունների կոռուպցիոն գործարքների հետաքննությամբ։
Թարգմանությունը՝ Էմմա Չոբանյանի
