10.12.2025 | 20:39
Հայաստան–Հունաստան հարաբերությունների խորացման նոր հնարավորություններ. Դավիթ Կարապետյանի հանդիպումը Լուկաս Ցուկալիսի հետ
ԵՄ երկրները նախնական համաձայնության են եկել Սիրիայի նկատմամբ տնտեսական պատժամիջոցները վերացնելու հարցում
Քաղաքականություն
20.05.2025 | 20:40
ԵՄ երկրները կանաչ լույս են տվել Սիրիայի նկատմամբ տնտեսական պատժամիջոցների վերացմանը՝ Բաշար ալ-Ասադի տապալումից հետո պատերազմից տուժած երկրին վերականգնվելու հարցում օգնելու համար։ Այս մասին լրատվամիջոցներին հայտնել են դիվանագետները։
ԵՄ անդամ 27 երկրների դեսպանները նախնական համաձայնության են եկել այս քայլի վերաբերյալ, որը պաշտոնապես պետք է հրապարակվի երեքշաբթի Բրյուսելում կայանալիք արտաքին գործերի նախարարների հանդիպման ժամանակ։ Աղբյուրները նշել են, որ վերջնական որոշումը նախարարներինն է։
ԵՄ դիվանագետները AFP-ին հայտնել են, որ համաձայնագիրը պետք է ներառի սիրիական բանկերին համաշխարհային համակարգից կտրող և կենտրոնական բանկերի ակտիվները սառեցնող պատժամիջոցների վերացումը։
Սակայն, ըստ դիվանագետների, դաշինքը մտադիր է նոր անհատական պատժամիջոցներ կիրառել էթնիկ լարվածություն հրահրող անձանց նկատմամբ՝ ալավիական փոքրամասնության դեմ մահացու հարձակումներից հետո։ Ասադի ռեժիմին ուղղված և քաղաքացիական բնակչությանը ճնշելու համար օգտագործվող զենքի կամ սարքավորումների վաճառքն արգելող այլ միջոցառումները պետք է մնան ուժի մեջ։
ԵՄ-ի վերջին քայլը հաջորդում է փետրվարին Սիրիայի տնտեսական հիմնական ոլորտների նկատմամբ որոշ պատժամիջոցների կասեցման առաջին քայլին։
Պաշտոնյաները հայտարարել են, որ այդ միջոցառումները կարող են վերականգնվել, եթե Սիրիայի նոր ղեկավարները խախտեն փոքրամասնությունների իրավունքները հարգելու և ժողովրդավարության ուղղությամբ շարժվելու խոստումները։
ԵՄ-ից սպասվող պաշտոնական հայտարարությունից առաջ Սիրիայի արտաքին գործերի նախարար Ասաադ ալ-Շաիբանին հայտարարել է, որ «պատժամիջոցների վերացումն արտահայտում է Սիրիային աջակցելու տարածաշրջանային և միջազգային կամքը»։
«Սիրիացի ժողովուրդն այսօր շատ կարևոր և պատմական հնարավորություն ունի՝ վերակառուցելու իր երկիրը։ Այսօրվա ծրագիրն է՝ օգտվել պատժամիջոցների վերացումից։ Սիրիայում ներդրումներ կատարել ցանկացողների համար դռները բաց են։ Սիրիայի հետ համագործակցել ցանկացողների համար պատժամիջոցներ չկան»,- ասել է նա։
Հիշեցնենք, որ մայիսի 13-ին էլ ԱՄՆ նախագահ Դոնալդ Թրամփն էր հայտարարել Սիրիայի դեմ պատժամիջոցները չեղարկելու մտադրության մասին։
Թարգմանությունը՝ Էմմա Չոբանյանի
