24.01.2026 | 08:40
Հայաստանի հետ խաղաղ միջուկային համագործակցության համաձայնագիր կկնքենք․ Թրամփ
«Չեմ կարծում, որ ԱՄՆ-ի հետ բանակցությունները որևէ բանի կհանգեցնեն». Իրանի հոգևոր առաջնորդ
Քաղաքականություն
20.05.2025 | 15:39
Իրանի գերագույն հոգևոր առաջնորդ Ալի Խամենեին հայտարարել է, թե չի կարծում, որ ԱՄՆ-ի հետ ընթացող անուղղակի միջուկային բանակցությունները որևէ արդյունք կտան։ Mehr գործակալության հաղորդմամբ՝ այս մասին նա ասել է նախօրեին Իրանի նախկին նախագահ Էբրահիմ Ռաիսիի մահվան տարելիցի կապակցությամբ կայացած արարողության ժամանակ ունեցած ելույթում, որի ընթացքում անդրադարձել է նաև միջուկային բանակցությունների թեմային։
«Բարձրացվել է միջուկային բանակցությունների հարցը։ Ես ծանուցում ունեմ մյուս կողմի համար»,- ասել է նա՝ հավելելով, որ ամերիկյան կողմը, որը ներգրավված է այս անուղղակի բանակցություններում, պետք է խուսափի անիմաստ դիտողություններ անելուց։
««Մենք թույլ չենք տա Իրանին հարստացնել ուրան»․ նման բաներ ասելն անհեթեթություն է։ Իրանում ոչ ոք չի սպասում ուրիշների թույլտվությանը։ Իսլամական Հանրապետությունն ունի իր սեփական քաղաքականությունն ու մեթոդները և դրանք կշարունակի անկախ։ Այլ հարմար ժամանակ ես կբացատրեմ իրանցի ժողովրդին, թե ինչու են ամերիկացիները և նրանց արևմտյան դաշնակիցներն այդքան համառորեն պնդում Իրանում ուրանի հարստացման դադարեցման հարցում։ Ես կհստակեցնեմ, թե որոնք են նրանց իրական մտադրությունները։ Մենք չենք կարծում, որ [միջուկային] բանակցությունները [ԱՄՆ-ի հետ] արդյունք կտան։ Մենք չգիտենք, թե ինչ տեղի կունենա»,- ընդգծել է Խամենեին։
Իրանի բանակցողները, արտգործնախարար Աբբաս Արաղչիի գլխավորությամբ, կիրակի Օմանի մայրաքաղաք Մասկատում անցկացրել են ամերիկյան պատվիրակության հետ բանակցությունների չորրորդ փուլը։ Ամերիկյան թիմը գլխավորել է ԱՄՆ նախագահի հատուկ բանագնաց Սթիվ Ուիթկոֆը։
Օմանի միջնորդությամբ անցկացված բանակցությունները երկու կողմից էլ բնութագրվել են որպես արդյունավետ և լավ ընթացք ունեցող։
Քննարկումները հիմնականում կենտրոնացած են Իրանի միջուկային ծրագրի և պատժամիջոցների վերացման վրա՝ 2015 թվականի պատմական համաձայնագիրը փոխարինելու հնարավոր համաձայնագրի միջոցով, որից ԱՄՆ-ը միակողմանիորեն դուրս էր եկել Դոնալդ Թրամփի առաջին նախագահության ընթացքում։
Ավելի վաղ էլ Իրանի գերագույն հոգևոր առաջնորդի ավագ խորհրդական Ալի Շամխանին հայտարարել էր, որ Թեհրանը պատրաստ է որոշակի պայմաններով միջուկային համաձայնագիր կնքել ԱՄՆ նախագահ Դոնալդ Թրամփի հետ՝ տնտեսական պատժամիջոցների վերացման դիմաց։
Թարգմանությունը՝ Էմմա Չոբանյանի
