Բաքվում շինծու գործերով նիստում տեսանյութ է ցուցադրվել, իբր, «ռազմական գործողություններին Դավիթ Իշխանյանի մասնակցությամբ»

Բաքվի զինվորական դատարանում այսօր տեղի է ունեցած Արցախի ղեկավարների ու այլ պաշտոնյաների շինծու գործերով հերթական դատական նիստում ներկայացվել է տեսանյութ։ Ադրբեջանական լրատվամիջոցների հաղորդմամբ՝ այն, իբր, հաստատվել է Արցախի ԱԺ նախագահ Դավիթ Իշխանյանի «անօրինական գործունեությունը Ադրբեջանի տարածքներում և նրա մասնակցությունը ռազմական գործողություններին»։ Տեսանյութում Իշխանյանի զինակից ընկերներն ու ծանոթները խոսում են նրա մասին։

Դրանում Ալիկ Սարգսյանն ասել է, թե «Իշխանյանն առաջին կամավորական ջոկատի հիմնադիրներից մեկը, ինչպես նաև վաշտերի և գումարտակների առաջին հրամանատարներից»։

«Նա կատարել է, այսպես ասած, պատմական խնդիր։ Զենք վերցնելով, ժողովրդի մեջ ինքնապաշտպանության գաղափարախոսությունը տարածելով, բոլորի համար անձնական օրինակ լինելով՝ նա կատարել է պատմական առաքելություն»,- ասել է Սարգսյանը Իշխանյանի մասին տեսանյութում։

Մովսես Հակոբյանն էլ դրանում հայտարարել է. «Հայկական բանակի ստեղծման հիմքը կամ հիմքը դրողներից մեկը մեր զինակից Դավիթն է»։

Աբրիկ Հայրապետյան էլ ասել է, որ ինքը բարձր է գնահատում Դավիթին որպես գումարտակի հրամանատար «Ավո» զորքերում։

Նշվում է, թե հայերի կողմից նկարահանված կադրերում Դավիթ Իշխանյանը ներկայացված է որպես ազատության համար պայքարող ուսանողական շարժման ռահվիրաներից մեկը, Աշան գյուղի «ինքնապաշտպանության ջոկատի» հրամանատարը, ինքնապաշտպանության բանակի 28-րդ գումարտակի հրամանատարը, իսկ պատերազմից հետո՝ հասարակական և քաղաքական գործիչ։

Կադրերում, ըստ ադրբեջանական լրատվամիջոցների հաղորդումների, Դավիթ Իշխանյանն ասում է. «Շատերն արդեն զգացել և նկատել են, որ այս շարժումն իր տրամաբանական ավարտին կհասնի միայն զինված բախումների և պատերազմի միջոցով։ Մենք փորձեցինք ստեղծել այս սարսափելի մթնոլորտն ադրբեջանցիների համար։ Մեր հիմնական խնդիրն էր ապահովել պաշտպանության գիծը։ Մենք իսկապես ուզում էինք մասնակցել այս գործողությանը, բայց մեր խնդիրն այլ էր։ «Աբդալ Գյուլաբլի» գործողության ժամանակ, ցավոք, մենք կորցրեցինք մեր 6 ընկերներին։ Դրանից հետո սկսվեց շատ դժվար շրջան։ 1992 թվականի սեպտեմբերի 4-5-ին մենք կարողացանք ազատագրել այս գյուղը։ Մեր առջև դրված խնդիրը Մարտունու շրջանում անթերի կատարվեց, և Աղդամը անցավ մեր ընդհանուր վերահսկողության տակ։ Ազատության համար մղված մարտերի ավարտից հետո գումարտակի տղաները մասնակցեցին նաև Մարտակերտի շրջանում մղված մարտերին, և կարելի է ասել, որ հաստատվեց հրադադար, որը տևեց մինչև 1994 թվականի մայիսը»։

Նշվում է, թե պետական ​​մեղադրողի հարցերին պատասխանելով՝ «Իշխանյանը հաստատել է, որ մասնակցել է Աշաղի Վեյսալիի և Քարդարի, Մարտակերտի միջև գտնվող բարձունքները գրավելու գործողություններին» ։

Նիստին ցուցադրվել է նաև ՀՀ առաջին նախագահ Լևոն Տեր-Պետրոսյանի ելույթի տեսագրությունը 1993 թվականի հուլիսի 23-ին «Երկրապահ»​-ի անդամների հետ հանդիպման ժամանակ։

Հաջորդ դատական նիստը նշանակվել է մայիսի 22-ին։

Թարգմանությունը՝ Էմմա Չոբանյանի