Բաքվում ընթացող Արցախի ղեկավարների շինծու գործերով նիստում Լևոն Տեր-Պետրոսյանի ելույթի տեսանյութ է ցուցադրվել

Բաքվի զինվորական դատարանում ընթանում է Արցախի ղեկավարների և այլ պաշտոնյաների՝ ընդհանուր 15 անձի նկատմամբ հարուցված շինծու գործերով հերթական դատական նիստը։ Ադրբեջանական լրատվամիջոցների հաղորդմամբ՝ այսօրվա նիստում ցուցադրվել է ՀՀ առաջին նախագահ Լևոն Տեր-Պետրոսյանի ելույթի տեսագրությունը 1993 թվականի հուլիսի 23-ին «Երկրապահ»​-ի անդամների հետ հանդիպման ժամանակ։ Ըստ ադրբեջանական կողմի՝ կադրերում Լևոն Տեր-Պետրոսյանը, իբր, «խոսում է Հայաստանի զինված ուժերի՝ Ադրբեջանի տարածքները գրավելու մտադրության, ինչպես նաև այդ որոշման նպատակների և պատճառների մասին»։

«Այս շարժման շնորհիվ Հայաստանն ու Ղարաբաղը լուծեցին մի խնդիր, որը հայ ժողովուրդը չէր կարող լուծել 600 տարի․ Հայաստանն ու Ղարաբաղը լիովին մաքրվեցին այլ ժողովուրդներից։ Հայ ժողովուրդը կզգա դրա կարևորությունը հաջորդ 600 տարիների ընթացքում։ Պատկերացրեք, եթե այսօր Հայաստանում շարունակեին ապրել 170 հազար այլ ազգությունների մարդիկ, ովքեր այստեղ ապրել են մինչև 1988 թվականը, այսօր մենք պետություն չէինք ունենա։ Մենք չէինք կարողանա պաշտպանել ո՛չ մեր հյուսիսային շրջանները, ո՛չ էլ Սևանը»,- ադրբեջանական լրատվամիջոցների հաղորդմամբ՝ տեսանյութում ասում է Տեր-Պետրոսյանը։

Բացի այդ, դատական նիստի ընթացքում հարցերի է պատասխանել Արցախի նախկին նախագահ Բակո Սահակյանը Շուշիի ազատագրումից հետո իր գործունեության, ստորաբաժանումներում ծառայելու և այլնի մասին։ Նա նշել է, թե 1993 թվականի հունիսից ի վեր ինքը թիկունքի ծառայությունների շտաբի պետն է եղել։

Սահակյանը նաև հայտնվել է հարցաքննության ժամանակ ցուցադրված տեսանյութում։ Կադրերում երևում են զինծառայողներ, որոնք նստած են սեղանի շուրջ և քննարկում են փաստաթղթեր և քարտեզ։ Ցուցադրված տեսանյութում Բակո Սահակյանը ճանաչել է գեներալ Քրիստափոր Իվանյանին, Սամվել Կարապետյանին, Մովսես Հակոբյանին, Սամվել Բաբայանին, Վիտալի Բալասանյանին, Վաչագան Իշխանյանին և այլոց։

Ըստ ադրբեջանական կողմի՝ նա հայտարարել է, որ մասնակցել է ռազմական գործողությունների և մարտական ​​ առաջադրանքների նախապատրաստմանն ու քննարկմանը։

Հիշեցնենք, որ մայիսի 16-ին տեղի ունեցած նախորդ նիստում օտարերկրյա ԶԼՄ-ների հոդվածներ էին ներկայացվել, իբր, «հայկական բանակի կողմից ադրբեջանական տարածքների գրավման մասին», ինչպես նաև ուսումնասիրվել էին միջազգային իրավապաշտպան կազմակերպության փաստաթղթեր։

Դատական նիստը շարունակվում է։

Թարգմանությունը՝ Էմմա Չոբանյանի