12.01.2026 | 10:45
Գուցե հրաժարվենք. չի կարող մանկապարտեզի նախագծման պրոցեսը տարիներ տևել. Ավինյան․ ՏԵՍԱՆՅՈՒԹ
Լրագրողները՝ ապակու հետևում. քաղաքապետարանը սահմանափակում է ԶԼՄ-ների աշխատանքը
19.05.2025 | 16:30
Երևանի ավագանու նիստերին լրագրողներն աշխատում են նիստերի դահլիճ տանող նախասրահից։ Ավագանու «Ազգային առաջընթաց» խմբակցության անդամ Հովսեփ Կուբատյանը ֆեյսբուքյան էջում հրապարակել է լուսանկար՝ հայտնելով, որ նախասրահը հիմնական դահլիճից այժմ առանձնացվել է ապակու միջոցով։
Այն դեպքերում, երբ միջադեպերի պատճառով ընդհատվում էին նիստերի ուղիղ հեռարձակումները, լրագրողները՝ այդ թվում նաև Factor TV-ն, հնարավորություն էր ունենում տեսաձայնագրել դահլիճում տեղի ունեցողը կամ հարցազրույցներ էր վերցնում այդ պահին նիստերի դահլիճում ներկա ավագանու անդամներից։ Այժմ, փաստորեն, նման հնարավորություն այլևս չենք ունենա։
Ինչո՞ւ է կայացվել նման որոշում, որը խոչընդոտում է լրագրողների աշխատանքը․ Երևանի քաղաքապետի մամուլի քարտուղար Հայկ Կոստանյանը Factor TV-ի հետ զրույցում այսպես մեկնաբանեց։
«Լրագրողների հատվածի թափանցիկ բաժանմամբ առանձնացումը պայմանավորված է այն հանգամանքով, որ ավագանու մի շարք նիստեր ուղեկցվել են լարված միջադեպերով և, որոշ դեպքերում, անպարկեշտ արտահայտություններով, այդ թվում՝ հայհոյանքներով։ Հաշվի առնելով, որ նման երևույթները ոչ միայն անընդունելի են, այլև ցանկալի չեն, որ հանրությունը դրանց ականատեսը լինի, անհրաժեշտ է դարձել ապահովել ավելի կազմակերպված և հանգիստ աշխատանքային միջավայր, որտեղ թե՛ նիստի մասնակիցները, թե՛ լրագրողները կարող են կատարել իրենց աշխատանքը՝ առանց խանգարելու միմյանց։ Այս փոփոխությունը չի սահմանափակում լրագրողների դիտարկման կամ լուսաբանման հնարավորությունները․ պահպանված են ուղիղ եթերի, ձայնագրության և տեղեկատվության հասանելիության բոլոր պայմանները»,- ասաց Կոստանյանը՝ չպատասխանելով հարցին, թե ով է կայացրել այս որոշումը։
Չնայած պնդումներին, որ ապակե պատն ապահովում է ավելի հանգիստ միջավայր, լրատվամիջոցների աշխատանքը փաստացի սահմանափակվում է։
Արփի Հակոբյան
