Մեր ժամանակակից արվեստը չի զիջում աշխարհին, բայց մերոնց չեն ճանաչում, մեծ բացթողում է․ Նունե Ավետիսյան. ՏԵՍԱՆՅՈՒԹ

«Մեր ժամանակակից արվեստը որևէ բանով չի զիջում աշխարհին, պարզապես մերոնց դրսում չեն ճանաչում, և դա մեր մեծագույն բացթողումն է»,- Factor TV-ի հետ զրույցում նշում է Երևանի Ժամանակակից արվեստի թանգարանի տնօրեն Նունե Ավետիսյանը։

Նա շեշտում է՝ մենք դրսում չենք ներկայացնում մեր ժամանակակից նկարիչներին, քանդակագործներին, օրինակ՝ Սարյանին ու Մինասին գիտեն Մոսկվայում, բայց դա, թանգարանի տնօրենի խոսքով, քիչ է։

«Պետք է մերոնց շատ ցուցադրել դրսում, հասկանում եմ, որ դա որոշակի ֆինանսների հետ է կապված, բայց, կարծում եմ, գոնե տարին մեկ անգամ մեր պետությունը կարող է իրեն դա թույլ տալ»,- ասում է թանգարանի տնօրենը։

Նունե Ավետիսյանը խոսում է նաև շենքային վատ պայմանների մասին, որոնք ունեն Հայաստանի մի շարք թանգարաններ, այդ թվում՝ իրենցը․ «Մեր տարածքը շատ սահմանափակ է, նկարիչներն ասում են՝ հենց ձեզ նոր շենք տան, նոր գործեր ենք բերելու։ Պատկերացնո՞ւմ եք՝ որքան նոր ցուցանմուշներով կարող է համալրվել մեր թանգարանը, եթե միայն դրա հնարավորությունը լինի։ Մենք հիմա բնակելի շենքի տարածքում ենք գործում, վերջերս, օրինակ, ջրի հոսք ունեցանք ֆոնդերում, ստիպված ենք եղել մի ցուցասրահը փակել, որպեսզի պահոց դարձնենք»։

Բացի այդ, թանգարանի տնօրենի խոսքով, ցուցանմուշների պահպանությանը վերաբերող խնդիրներ կան՝ օդափոխությունից մինչև համապատասխան ջերմաստիճանի ապահովում։

Հիշեցնենք՝ այս տարի «Թանգարանների գիշեր»-ը և Թանգարանների միջազգային օրը մայիսի 17-ին և 18-ին է, թանգարանների մուտքն անվճար է: «Թանգարանների գիշեր» միջոցառման այս տարվա խորագիրն է՝ «Թանգարանների ապագան արագ փոփոխվող համայնքներում»։

Մանրամասները՝ տեսանյութում։

Աննա Բաբաջանյան