09.06.2026 | 12:02
Սպասվում են հորդառատ անձրևներ
Ընտրագրավը 10 մլն դրամից կդառնա 7 մլն դրամ
Քաղաքականություն
09.10.2018 | 12:18
Կառավարությունում այսօր ընթանում է Ընտրական օրենսգրքի փոփոխությունների վերաբերյալ նախագծի քննարկումը արտախորհրդարանական ուժերի ներկայացուցիչների հետ։
Ընտրական օրենսգրքի բարեփոխումների կառավարական հանձնաժողովի քարտուղար Դանիել Իոաննիսյանի փոխանցմամբ՝ արդեն իսկ հստակ ամրագրված է առաջարկվող փոփոխություններով, որ Ազգային ժողով պետք է ացնեն նվազագույնը 4 քաղաքական ուժ՝ դաշինքների կամ կուսակցությունների տեսքով, իսկ անցողիկ շեմը կուսակցությունների համար լինելու է 4, դաշինքների համար 6 տոկոս։
Դանիել Իոաննիսյանը նաև հավելեց, որ առաջարկվող փոփոխություններով անվճար եթերաժամանակի քանակն է ավելացված, իսկ ինչ վերաբերում է ընտրագրավին, ապա 10 մլն դրամի փոխարեն գրավի չափը նվազեցվել է՝հասցվելով 7 մլն դրամի։
Հայաստանի Դեմոկրատական կուսակցության նախագահ Արամ Սարգսյանը նշեց, որ թեև իրենց կուսակցությունը ողջունում է Ընտրական օրենսգրքի փոփոխությունները, սակայն, նշեց, որ գրավի չափը պետք է փոխարինել այլ մեխանիզմով՝ օրինակ ստորագրահավաքով։
Արամ Սարգսյանը նաև նկատեց, որ ընտրագրավը դեմ է ժողովրդավարության սկզբունքներին և չի կարելի կուսակցություններին պարտադրել գումար դնել մի կողմ, եթե պետությունը չի կարողանում դա իրականացնել, ապա պետք է ընտրագրավի փոխարեն այլ բան մտածի։
Հարցին ի պատասխան՝ Դանիել Իոաննիսյանը նկատեց, որ ստորագրահավաքի կազմակերպումը հավելյալ ժամանակ է պահանջում, ինչի հնարավորությունը չունեն արտահերթ խորհրդարանական ընտրություններին մասնակցող կուսակցություններն ու դաշինքները։
ԸՕ-ում սահմանված ընտրագրավի 7 մլն դրամի վերաբերյալ իր դժգոհությունն արտահայտեց նաև Հանրային խորհրդի անդամ Արշակ Սադոյանը՝ նշելով, որ սահմանված ընտրագրավի չափը հնարավորություն է տալու ընտրություններին մասնակցել հարուստ կուսակցություններին և արդյունքում քաղաքական նպատակ ունեցող շատ կուսակցություններ զրկվելու են խորհրդարանական ընտրություններին մասնակցելու հնարավորությունից և կստացվի բիզնես կուսակցությունները կկարողանան ներգարվվել այդ գործընթացին։
Սադոյանի մտահոգություններին ի պատասխան էլ Դանիել Իոաննիսյանը նշեց, որ եթե քաղաքական կուսակցությունը հայտ է ներկայացրել մասնացել ընտրություններին, ապա կարող է իր կուսակիցների թիմում կազմակերպել դրամահավաք՝ լուծելով ընտրագրավի հարցը։
