08.09.2026 | 10:31
Պապոյանը Դուբայում քննարկել է հայկական կառուցապատման ոլորտը միջազգային հարթակներում ներկայացնելու հնարավորությունները
Թուրքիայի ԱԳ նախարարը «հնարավորության պատուհան» է տեսնում Ուկրաինայի և Ռուսաստանի միջև բանակցությունների համար
Քաղաքականություն
15.05.2025 | 20:26
Թուրքիայի արտաքին գործերի նախարար Հաքան Ֆիդանը լավատեսություն է հայտնել, որ Թուրքիայի կողմից հյուրընկալվող Ուկրաինայի և Ռուսաստանի միջև խաղաղության բանակցությունները կարող են նոր սկիզբ դառնալ տարիներ տևած հակամարտությունից հետո։
«Այժմ, երեք տարվա անսահման տառապանքներից հետո, վերջապես հնարավորությունների պատուհան է բացվել»,- ասել է Ֆիդանը Թուրքիայի Անթալիա նահանգում ՆԱՏՕ-ի արտաքին գործերի նախարարների հանդիպման ժամանակ իր ողջույնի խոսքում։
«Բանակցությունները, հուսով ենք, կարող են նոր գլուխ բացել»,- հավելել է Ֆիդանը՝ ընդգծելով, որ «Թուրքիան միշտ ընդգծել է այս նպատակով դիվանագիտական ուղու անհրաժեշտությունը»։
Նա նշել է ՆԱՏՕ-ի տարածքում անվտանգության ցանց ստեղծելու կարևորությունը։
«Ուկրաինայում պատերազմի արդարացի ավարտը մեր քննարկումների կարևոր մասն է լինելու: Մեր այսօրվա հանդիպումը կարևոր առիթ կլինի՝ քննարկելու, թե ինչպես կարող ենք անհատապես և համատեղ աջակցել այս գործընթացին»,- ասել է Թուրքիայի ԱԳ նախարարը։
Ֆիդանը շեշտել է դաշինքի համապարփակ մոտեցումը Արևելյան Եվրոպայից դուրս անվտանգության նկատմամբ։
«Մեր հարավային հարևանությունը և Բալկանները նույնպես ՆԱՏՕ-ի եվրատլանտյան անվտանգության նկատմամբ 360 աստիճանի մոտեցման կարևոր մասերն են»,- ասել է նա՝ հավելելով, որ նախարարները «կմտածեն այն մասին, թե ինչ կարող ենք անել որպես դաշնակիցներ՝ գործընկերությունները խորացնելու համար՝ Մերձավոր Արևելքից մինչև Աֆրիկա և Ասիա-խաղաղօվկիանոսյան տարածաշրջան՝ կայունությունը ամրապնդելու համար»։
Ֆիդանի խոսքով՝ ահաբեկչությունը մնում է «լուրջ սպառնալիք բոլոր դաշնակիցների անվտանգության համար», և նախարարները կքննարկեն այս «աղետի» դեմ համերաշխությունն ամրապնդելու կոնկրետ քայլերը։
«ՆԱՏՕ-ն՝ որպես եվրաատլանտյան անվտանգության և պաշտպանության ողնաշար, կշարունակի մնալ անդրատլանտյան կարևորագույն ֆորում՝ դաշնակիցների միջև անվտանգության բոլոր հարցերով խորհրդակցելու, համակարգելու և գործելու համար»,- ասել է նա։
Ֆիդանը ընդգծել է Թուրքիայի հավատարմությունը դաշինքին՝ նշելով, որ ներկայիս հանդիպումը հյուրընկալելուց բացի, «այն փաստը, որ Անկարան նաև հյուրընկալելու է հաջորդ գագաթնաժողովը 2026 թվականին, ցույց է տալիս անսասան հավատարմությունը դաշինքին և այն ամենին, ինչ այն պաշտպանում է»։
ՆԱՏՕ-ի գլխավոր քարտուղար Մարկ Ռյուտեն կրկնել է հավաքի կարևորությունը՝ ընդգծելով դաշինքի ուժը և զսպման կարողությունները ամրապնդելու անհրաժեշտությունը։
Հավելենք, որ այսօր Ստամբուլում տեղի են ունենալու ռուս-ուկրաինական բանակցություններ։
Թարգմանությունը՝ Էմմա Չոբանյանի
