31.05.2026 | 20:00
չԾխելու ՇԵՐՏԵՐԸ. ինչպես է շրջանցվում արդեն 6 տարի գործող օրենքը․ ՏԵՍԱՆՅՈւԹ
Բաքուն կրկին խոսել է ՀՀ-ի հետ խաղաղության համաձայնագրի ստորագրման գլխավոր պայմանի մասին
Քաղաքականություն
14.05.2025 | 20:48
Ադրբեջանի արտաքին գործերի փոխնախարար Էլնուր Մամեդովը Եվրոպայի խորհրդի Նախարարների կոմիտեի 134-րդ նստաշրջանի ընթացքում, որը տեղի է ունեցել մայիսի 13-14-ը Լյուքսեմբուրգում, հայտարարել է այս տարվա մարտին Ադրբեջանի և Հայաստանի միջև խաղաղության պայմանագրի տեքստի և միջպետական հարաբերությունների հաստատման շուրջ բանակցությունների ավարտի մասին։
«Միաժամանակ, ընդգծվել է, որ համաձայնագրի ստորագրման գլխավոր պայմանը Հայաստանի Սահմանադրությունում փոփոխություններ կատարելն է՝ Ադրբեջանի ինքնիշխանության և տարածքային ամբողջականության նկատմամբ հավակնությունները վերացնելու համար, նշվել է հնացած և անգործունակ ԵԱՀԿ Մինսկի խմբի և համապատասխան կառույցների պաշտոնական լուծարման անհրաժեշտությունը»,- ասվում է Ադրբեջանի ԱԳՆ-ի հաղորդագրությունում։
Մամեդովը նշել է, որ Ադրբեջանը պատրաստ է շարունակել երկկողմ երկխոսությունը այս ու երկու երկրների միջև հարաբերությունների կարգավորման գործընթացին վերաբերող այլ հարցերի շուրջ։
Նա, միաժամանակ, ասել է, թե Եվրոպայի խորհրդի Խորհրդարանական վեհաժողովի կողմից 2024 թվականի հունվարին ադրբեջանական պատվիրակության լիազորությունները չհաստատելը իրավական տեսանկյունից բացարձակապես անհիմն է և հակասում է այն դրույթին, որ բոլոր անդամ պետությունները պետք է հավասար հիմունքներով մասնակցեն Եվրոպայի խորհրդի երկու կանոնադրական մարմիններին։
Մամեդովն ընդգծել է իրավիճակի արագ կարգավորման անհրաժեշտությունը՝ վեհաժողովին Ադրբեջանի անվերապահ մասնակցությունը վերականգնելու համար, որը պետք է ծառայի որպես միջխորհրդարանական երկխոսության և համագործակցության հարթակ։
Հիշեցնենք, որ 2024 թվականի հունվարի 24-ին ԵԽԽՎ-ն քվեարկությամբ որոշել էր չվավերացնել Ադրբեջանի պատվիրակության լիազորությունները։ Այս որոշմամբ Ադրբեջանի պատվիրակությունն առնվազն մեկ տարով հեռացվել է ԵԽԽՎ-ից և կարող է վերադառնալ իր կանոնադրական պարտավորությունները կատարելու դեպքում։ Ադրբեջանական պատվիրակության նկատմամբ քաղաքական պատժամիջոցներ սահմանող որոշմանը կողմ էր քվեարկել 76, դեմ՝ 10 պատգամավոր, ևս 4 խորհրդարանական ձեռնպահ է մնացել։ Ի պատասխան՝ Բաքուն հայտարարել էր, որ ԵԽԽՎ անդամներին, որոնք դեմ են քվեարկել ադրբեջանական պատվիրակության լիազորությունների երկարաձգմանը, արգելվում է մուտք գործել երկիր։
Թարգմանությունը՝ Էմմա Չոբանյանի
