Բաքվից արձագանքել են Նիկոլ Փաշինյանի «Խաղաղության խաչմերուկ» նախագծին

Ադրբեջանի ԱԳ փոխնախարար Յալչին Ռաֆիևը մեկնաբանել է ՀՀ վարչապետ Նիկոլ Փաշինյանի կողմից ներկայացված «Խաղաղության խաչմերուկ» նախաձեռնությունը։ Ադրբեջանական լրատվամիջոցների հաղորդմամբ՝ Ռաֆիևն այս մասին խոսել է Մեջլիսում «Գլոբալ Հարավի և Արևմուտքի վերելքը. Ադրբեջանի դերը, համագործակցության և զարգացման նոր հնարավորություններ» թեմայով քննարկման ժամանակ։

«Բոլոր պետությունների վերաբերմունքը «Խաղաղության խաչմերուկ» կոնցեպտին և յուրաքանչյուր նախաձեռնության հետագա ճակատագիրը կախված է նրանից, թե որքանով է այն անկեղծ և ինչպիսին են այդ անկեղծության հետևում կանգնած իրական գործնական քայլերը: Մենք նաև կդիտարկենք այդ գործնական քայլերը»,- հայտարարել է նա։

Հիշեցնենք, որ այս տարվա հունվարին Ադրբեջանի նախագահ Իլհամ Ալիևը մտահոգություն էր հայտնել Հայաստանի կողմից ներկայացվող «Խաղաղության խաչմերուկ» նախագծի կապակցությամբ։

«Երևի լսել եք, որ գործի է դրվել է, այսպես կոչված, «Խաղաղության խաչմերուկ» նախագիծը, և այժմ աշխարհում չկա մի երկիր, որին չներկայացնեն այն։ Բայց այդ զավեշտալի նախագիծն առանց Ադրբեջանի գրոշի արժեք չունի, և մենք դա բազմիցս տարբեր խողովակներով փոխանցել ենք հայկական կողմին։ Եթե ​​իսկապես ցանկանում են իրականացնել այս նախագիծը, ապա նախ պետք է դիմեն Ադրբեջանին։ Նրանք հերթական անգամ տարբեր շրջանակներում խրախուսում են կեղտոտ արշավներ Ադրբեջանի դեմ։ Արդյունքում, մինչ օրս մենք չունենք ամենակարճ և ամենահարմար կապը Նախիջևանի Ինքնավար Հանրապետության հետ»,- ասել էր Ալիևը։

Հավելենք, որ ՀՀ «Խաղաղության խաչմերուկ» նախաձեռնությանն իրենց աջակցությունն են հայտնել ԱՄՆ-ը, ԵՄ-ն, Իրանը և մի շարք այլ երկրներ։

Թարգմանությունը՝ Էմմա Չոբանյանի